*D Er hât hie erliten grôze nôt unt er muoz nû kêren in den tôt. swaz erden hât umbeslagenz mer, dâne gelac nie hûs sô wol ze wer als Munsalvæsche, swâ diu stêt. von strîte rûher wec dar gêt. bî sîme gemache in hînte lât. morgen sag man im den rât.« Des volgeten al die râtgeben. sus behielt hêr Gawan dâ sîn leben. man pflac des heldes unverzagt des nahtes al dâ, wart mir gesagt, daz harte guot was sîn gemach. dô man den mitten morgen sach unt dô man messe gesanc, ûf dem palase was grôz gedranc von bovel unt von werder diet. der künec tet, als man im riet. er hiez Gawanen bringen. den wolter nihtes twingen, wan als ir selbe hât gehôrt. nû seht, wâ in brâhte dort Antikonie, diu wol gevar. ir vetern sun kom mit ir dar unt ander genuoge des küneges man. diu küneginne vuorte Gawan vür den künec an ir hende. ein schapel was ir gebende. Ir munt den bluomen nam ir prîs. ûf dem schapele decheinen gewîs

*m er hât hie erliten grôze nôt und muoz nû kêren in den tôt. waz erden umbeslagen hât daz mere, dâ engelac nie hûs sô wol ze were als Muntsalvasche, wâ diu stât. von strîte rûher wec dar gât. bî sînem gemache in hînaht lât. morgen sage man ime den rât.« des volgeten alle râtgeben. sus behielt hêr Gawan dâ sîn leben. Man pflac des heldes unverzaget des nahtes, wart mir gesaget, daz harte guot was sîn gemach. dô man den mitten morgen sach und dô man messe sanc, ûf dem palase was grôz gedranc von povel und von werder diet. der künic tet, als man ime riet. er hiez Gawanen bringen. den wolt er nihtes twingen, wenne als ir selbe habt gehôrt. nû sehet, wâ in brâhte dort Anticonie, diu wol gevar. ir veteren sun kam mit ir dar und andere genuoge des küniges man. diu künigîn vuorte Gawan vür den künic an ir hende. ein schappel was ir gebende. ir munt den pluomen nam den prîs. ûf dem schappel dekein wîs

*G er hât hie erliten grôze nôt unde muoz nû kêren in den tôt. swaz erden hât umbeslagen daz mer, sône gestuont nie hûs sô wol ze wer als Muntsalvatsche, swâ diu stêt. von strîte rûher wec dar gêt. bî sînem gemach in hînt lât. morgen sage man im den rât.« des volgten al die râtgeben. sus behielt hêr Gawan dâ sîn leben. man pflac des heldes unverzaget des nahts dâ, wart mir gesaget, daz harte guot was sîn gemach. dô man den mitten morgen sach unt man messe gesanc, ûf dem palase wart grôz gedranc von povel unde von werder diet. der künic tet, als man im riet. er hiez Gawanen bringen. den wolter nihtes dwingen, wan als ir selbe habet gehôrt. nû seht, wâ in brâhte dort Antikonie, diu wol gevar. ir vetern sun kom mit ir dar unde ander genuoge des küniges man. diu künigîn vuorte Gawan vür den künic an ir hende. ein schappel was ir gebende. ir munt den bluomen nam den brîs. ûf dem schappele deheine wîs

*T er hât hie erliten grôze nôt unde muoz nû kêren in den tôt. swaz erden umbeslagen hât daz mer, sône gelac nie hûs sô wol ze wer alse Munsalvasche, swâ diu stât. von strîte rûher wec dar gât. bî sînem gemache in niht lât. morgen sage man im den rât.« Des volgeten alle die râtgeben. sus behielt Gawan sîn leben. man pflac des heldes unverzaget des nahtes dâ, wart mir gesaget, daz harte guot wart sîn gemach. dô man den driten morgen sach unde dô man messe gesanc, ûf den palas wart grôz gedranc von bovele unde von werder diet. Der künec tet, als man im riet. er hiez Gawanen bringen. den wolter nihtes twingen, wan alsir selbe habt gehôrt. Nû seht, wâ in brâhte dort Antickonie, diu wolgevar. ir vetern sun kom mit ir dar unde andere genuoge des küneges man. diu künegîn vuorte Gawan vür den künec an ir hende. ein schapel was ir gebende. ir munt den bluomen nam den prîs. ûf dem schapel deheine wîs