*D Daz wâren Scheruleses man; von den wart ez dâ guot getân. Waz mag ich nû sprechen mêr, wan Poydiconjunz was hêr. der reit dar zuo mit solher kraft, wære Swarzwalt ieslîch stûde ein schaft, man dörfte dâ niht mêr waldes sehen, swer sîne schar wolde spehen. der reit mit sehs vanen zuo, vor den man strîtes begunde vruo. Pûsûnærer gâben dôzes klac alsô der doner, der ie pflac vil angestlîcher vorhte. manec tambûrer dâ worhte mit der busûnærer galm. wart inder kein stupfen halm getreit, des enmöht ich niht. Erffurter wîngarte giht von treten noch der selben nôt. maneg orses vuoz die slâge bôt. Dô kom der herzoge Astor mit strîte an die von Jamor. dâ wurden tjoste gewetzet, manec werder man entsetzet hinderz ors ûfen acker. si wâren ir strîtes wacker. vil werder krîe man dâ rief. manec vole âne sînen meister lief, des hêrre dort ze vuoze stuont. ich wæne, dem was gevelle kunt.

*m daz wâren Scheruleses man; von den wart ez guot getân. Daz mac ich nû sprechen mêr, wane Poidiconiunz was hêr. der reit dar zuo mit solicher kraft, wære Swarzwalt ieglîch stûde ein schaft, man dörfte dâ niemêr waldes sehen, wer sîne schar wolte spehen. der reit mit sehs vanen zuo, vor den man strîtes begunde vruo. pusûnære gâben dôzes klac als der toner, der ie pflac vil angestlîcher vorhte. manic tambûre dâ worhte mit der busûnære galm. wart inder dâ kein stupfelhalm getretet, des enmöhte ich niht. er vürhtet der wîngarten niht von treten noch der selben nôt. manic rosses vuoz die slâge bôt. dô kam der herzoge Astor mit strîte an die von Jamor. dâ wurden juste gewetzet, manic werder man entsetzet hinder daz ros ûf den acker. si wâren ir strîtes wacker. vil vrömder krîe man dâ rief. manic vol âne sînen meister lief, des hêrre dort ze vuoze stuont. ich wæne, dem was gevelle kunt.

*G daz wâren Tscheruleses man; von den wart ez dâ guot getân. waz welt ir, daz ich spreche mêr, wan Poydeconiunz was hêr. der reit dâ zuo mit solher kraft, wære Swarzwalt ieslîch stûde ein schaft, man dörfte dâ nimer waldes sehen, swer sîne schar wolte spehen. der reit mit sehs vanen zuo, vor dem man strîtes begunde vruo. busûnære gâben gedôzes klac als der doner, der ie dâ pflac vil angestlîcher vorhte. manic tambûr worhte mit den busûnæren galm. wart inder dâ dehein stupfelhalm getretet, des enmöht ich niht. Erphurtære wîngarte giht von tretene noch der selben nôt. vil orse vüeze die slâ dâ bôt. nû kom der herzoge Astor mit strîte an die von Amor. dâ wurden tjost gewetzet, manic werder man gesetzet hinderz ors ûf den acker. si wâren ir strîtes wacker. vil vrömder krîe man dâ rief. manic vole ân sînen meister lief, des hêrre dort ze vüezen stuont. ich wæne, im was gevelle kunt.

*T daz wâren Tscheruleses man; von den wart ez dâ guot getân. Waz welt ir, daz ich spreche mêr, wan Poydekunyunz was mit wer. der reit mit sölher hers kraft, wære Swarzwalt iegeslîch stûde ein schaft, man dörfte dâ niht mêr waldes sehen, swer sîne schar wolte spehen. der reit mit sehs vanen zuo, vor dem man strîtes begunde vruo. busûnære gâben dôzes klac alse der doner, der ie pflac vil angestlîcher vorhte. manege tambûr worhte mit der busîne galm. wart iener dâ kein stupfelhalm getret, des enmag ich niht. Enpfirter wîngarte giht von treten noch der selben nôt. vil orse vuoz diu slâ dâ bôt. Dô kom der herzoge Astor mit strîte an die von Jammor. dâ wurden diu ors gewetzet, manec werder man gesetzet hinderz ors ûf den acker. si wâren ir strîtes wacker. vil vremder krîe man dâ rief. manec vol ân sînen meister lief, des hêrre dort ze vuoz stuont. ich wæne, im was gevelle kunt.