*D Dâ wære ze swachem werde, vor Bearosche ûf der erde, man sach dâ wâpenrocke vil hôher an der koste zil. diu naht tet nâch ir alten site: am orte ein tag ir zogete mite. den kôs man niht bî lerchen sanc. manec hurte dâ vil lûte erklanc; daz kom von strîtes sachen. man hôrt diu sper dâ krachen, reht als ez wære ein wolkenrîz. dâ was daz junge her von Liz komen an die von Lirivoyn unt an den künec von Avendroyn. dâ erhal manec rîchiu tjoste guot, als der würfe in grôze gluot ganze kastâne. âvoy, wie ûf dem plâne von den gesten wart geriten unt von den burgæren gestriten! Gawan unt der schahteliur, durch der sêle âventiur unt durch ir sælden urhap ein pfaffe in eine messe gap. der sanc si beide got unt in. dô nâhte ir werdecheit gewin, wandez was ir gesetze. dô riten si in ir letze. ir zingel was dâ vor behuot mit manegem werden ritter guot.

*m dâ wære ze swachem werde, vor Bearosche ûf der erde, man sach dâ wâpenrocke vil hôher an der koste zil. Diu naht tet nâch altem site: am orte ein tac ir zogete mite. den kôs man niht bî lerchen sanc. manic her dâ vil lûte erklanc; daz kam von strîtes sachen. man hôrte sper dâ krachen, rehte als ez wære ein wolkenrîz. dô was daz junge her von Liz komen an die von Lirwoin und an den künic von Avendroin. dâ erhal manic rîchiu juste guot, als der würfe in eine gluot ganze kastâne. âvoy, wie ûf dem plâne von den gesten wart geriten und von den burgæren wart gestriten! Gawane und dem schahteliure durch der sêlen âventiure und durch ir sælden urhap ein pfaffe ein messe gap. der sanc si beide gote und in. dô nâhete ir werdicheit gewin, wand ez was ir gesetze. dô riten si in ir letze. ir zingel was dâ vor behuot mit manigem werden ritter guot.

*G wære ze swachem werde, vor Bearotsche ûf der erde, man sach dâ wâpenrocke vil wol rîcher an der koste zil. diu naht tet nâch ir altem site: an dem orte ein tac ir zogte mite. den kôs man niht bî lerchen sanc. manic hurte dâ vil lûte erklanc; daz kom von strîtes sachen. man hôrte vil sper dâ krachen, reht als ez wære ein wolkenrîz. dâ was daz junge her von Liz komen an die von Liravoyn unde an den künic von Avendroyn. dâ erhal manic rîche tjoste guot, alsô der würfe in grôze gluot ganze kastâne. âvoy, wie ûf dem plâne von den gesten wart geriten unde von den burgæren gestriten! Gawan unde der schahteliur, durch der sêle âventiur unde durch ir sælden urhap ein pfaffe in eine messe gap. er sanc si beidiu got unde in. dô nâhet in werdicheit gewin, daz was ir gesetze. dô riten si in ir letze. ir zingel was dâ vor behuot mit manigem werden rîter guot.

*T wære dâ ze swachem werde, vor Bearosche ûf der erde, man sach dâ wâpenrocke vil wol rîche an der koste zil. Diu naht tet nâch ir altem site: an einem orte der tac ir zogete mite. den kôs man niht bî lerchen sanc. manec hurte dâ vil lûte erklanc; daz kom von strîtes sachen. man hôrte diu sper dâ krachen, reht als ez wære ein wolken rîz. Dô was daz junge her von Liz komen an die von Lyravoyn unde an den künec von Evendroyn. dâ hal manec tjost guot, alse der würfe in grôze gluot ganze kastânie. âvoy, wie ûf der plânîe von den gesten wart geriten unde von den burgæren gestriten! Gawan unde der schahteliur, durch der sêle âventiur unde durch ir sælden urhap ein pfaffe in eine messe gap. der sanc si beide gote unde in. dô nâhet ir werdecheit gewin, daz was ir gesetze. dô ritens in ir letze. ir zingel was dâ wol behuot mit manegem werden rîter guot.