*D Swaz hers anderhalp der brücken lac, daz zogete über, ê kœm der tac, ze Bearosche in die stat, als si Lyppaut, der vürste, bat. dô wâren die von Jamor geriten über die brücken vor. man bevalch ieslîche porten sô, daz si werlîche dô stuonden, dô der tac erschein. Scherules, der kôs im ein, die er unt mîn hêr Gawan niht unbehuot wolden lân. Man hôrt dâ von den gesten - ich wæne, daz wâren die besten -, die klageten, daz dâ wære geschehen ritterschaft gar ân ir sehen unt daz diu vesperîe ergienc, daz ir deheiner tjost dâ enpfienc. diu klage was gar ân nôt, ungezalt mans in dâ bôt, allen den, dies geruochent unt es ûz ze velde suochent. in den gazzen kôs man grôze slâ. ouch sach man her unt dâ manege baniere zogen în, allez bî des mânen schîn, unt manegen helm von rîcher kost - man wolde si vüeren gein der tjost - unt manec sper wol gemâl. ein Regenspurger zindâl

*m waz hers anderhalp der brücke lac, daz zouwete ouch über, ê kœme der tac, ze Bearosche in die stat, als si Lippout, der vürste, bat. dô wâren die von Jamor geriten über die brücken vor. man bevalch iegelîche porten sô, daz si werlîchen dô stuonden, dô der tac erschein. Scherules, der kôs im ein, die er und Gawan niht unbehuot wolten lân. man hôrte dâ von den gesten - ich wæne, daz wâren die besten -, die klageten, daz dâ was geschehen ritterschaft gar âne ir sehen und daz diu vesperîe ergienc, daz ir dekeiner just dâ entvienc. diu klage was gar âne nôt, ungezalt mans in dâ bôt, allen den, die es dô geruochten und es ûz ze velde suochten. in den gazzen kôs man grôze slâ. ouch sach man hie und dâ manige baniere zogen în, allez bî dem mâneschîn, und manigen helm von rîcher kost - man wolte si vüeren gegen der jost - und manic sper wol gemâl. ein Regensburger zindâl

*G swaz hers anderhalp der brücke lac, daz zogete ouch über, ê kœme der tac, ze Bearotsche in die stat. Libaut, der vürste, si des bat. ouch wâren die von Amor geriten über die brücke vor. Man bevalch ieslîche porte sô, daz si werlîche dô stuont, als der tac erschein. Tscherules, der kôs im ein, die er unde hêr Gawan niht unbehuot wolten lân. man hôrte dâ von den gesten - ich wæne, daz wâren die besten -, si klagten, daz dâ was geschehen rîterschaft gar âne ir sehen unt daz diu vesperîe ergienc, daz ir deheiner tjost enpfienc. diu klage was gar âne nôt, wan ungezalt mans in dâ bôt, allen, dies geruochten unde si ze velde suochten. in den gazzen kôs man grôze slâ. ouch sach man her unde dâ manige banier trecken în, allez bî des mânen schîn, unde manigen helm von rîcher kost - man wolt si vüeren gein der tjost - unt manic sper wol gemâl. ein Regenspurgære zendâl

*T Swaz hers anderhalp der bürge lac, daz zogete ouch über, ê kœme der tac, ze Bearosche in die stat. Lybaut, der vürste, si des bat. Ouch wâren die von Jammor geriten über die brücke vor. man bevalch iegelîche porten sô, daz si werlîche dô stuont, alse der tac erschein. Tscherules, der kôs im ein, dier unde hêr Gawan niht unbehuot wolten lân. man hôrte dâ von den gesten - ich wæne, dâ wâren die besten -, si klageten, daz dâ was geschehen rîterschaft gar âne ir sehen unde daz diu vesperîe ergienc, daz ir deheiner tjost enpfienc. Diu klage was gar âne nôt, wand ungezalt manz in dâ bôt unde allen, dies geruochten unde ez ze velde suochten. In den gazzen kôs man grôze slâ. ouch sach man her unde dâ manege baniere trecken în, allez bî dem mânen schîn, unde manegen helm von rîcher kost - er wolte si vüeren gegen der tjost - unde manec sper wol gemâl. ein Regespurgære zindâl