*D Künnet ir danne ritters vuore spehen, ir müezet im rehter dinge jehen. sîn lîp gein valsche nie wart balt. swer im dâr über tuot gewalt, wærez mîn vater oder mîn kint, alle, die gein im in zorne sint, mîne mage oder mîn bruoder, die müesen diu strîtes ruoder gein mir ziehen. ich wil in wern, vor unrehten strîten nern, swâ ich, hêrre, vor iwern hulden mac. ûz schildes ambet in einen sac wolt ich mich ê ziehen, sô verre ûz arde vliehen, dâ mich niemen erkande, ê daz ir iwer schande, hêrre, an im begienget. güetlîche ir enpfienget billîcher alle, die her sint komen unt iwern kumber hânt vernomen, denne daz ir si wellet rouben. des sult ir iuch gelouben.« Der vürste sprach: »nû lâz mich in gesehen, dâ mac niht arges ûz geschehen.« er reit, dâ er Gawanen sach. zwei ougen unt ein herze jach, diu Lyppaut mit im brâhte dar, daz der gast wære wol gevar unt rehte manlîche site sînen gebærden wonten mite.

*m künnet ir denne ritters vuore spehen, ir müezet im rehter dinge jehen. sîn lîp gegen valsche nie wart balt. wer ime dâr über tuot gewalt, wær ez mîn vater oder mîn kint, alle, die gegen ime in zorne sint, mîne mage oder mîn bruoder, die müesen diu strîtes ruoder gegen mir ziehen. ich wil in wern, vor unrehten strîten nern, wâ ich, hêrre, vor iuwern hulden mac. †und† schiltes ambet in einen sac wolt ich mich ê geziehen, sô verre ûz arde vliehen, dâ mich niemen erkande, ê daz ir iuwere schande, hêrre, an im begienget. güetlîch ir enpfienget billîcher alle, die her sint komen und iuwern kumber hânt vernomen, danne daz ir si wellet rouben. des sult ir mir gelouben.« der vürste sprach: »lâz mich in sehen, dâ mac niht arges von geschehen.« er reit, dâ er Gawanen sach. zwei ougen und ein herze jach, diu Lippout mit ime brâhte dar, daz der gast wær wol gevar und rehte manlîche site sînen gebærden wonten mite.

*G künnet ir danne rîters vuore spehen, ir müezt im rehter dinge jehen. sîn lîp wart nie gein valsche balt. swer im dâr über tæte gewalt, ez wære mîn vater oder mîniu kint, alle, die gein im in zorn sint, mîne mage ode mîne bruoder, die müesen diu strîtes ruoder gein mir ziehen. ich wil in weren, vor unrehten strîten neren, swâ ich, hêrre, vor iweren hulden mac. ûz schiltes ambet in einen sac wolt ich mich ê ziehen, sô verre ûz arde vliehen, dâ mich niemen erkande, ê daz ir iwer schande, hêrre, an im begienget. billîche ir enpfienget güetlîche alle, die her sint komen unde iweren kumber habent vernomen, dane daz ir si welt rouben. des sult ir iuch gelouben.« der vürste sprach: »nû lâ mich sehen, dâne mac niht arges zuo geschehen.« er vuort in, dâ er Gawanen sach. zwei ougen unde ein herze jach, diu Libaut mit im brâhte dar, daz der gast wære wolgevar unt daz rehte manlîche site sînen gebærden wonte mite.

*T welt ir danne rîters vuore spehen, ir müezet im guoter dinge jehen. sîn lîp wart nie gegen valsche balt. swer im dâr über tæte gewalt, ez wære mîn vater oder mîn kint, alle, die gegen im in strîte sint, mîne mage oder mîne bruoder, die müesen diu strîtes ruoder gegen mir ziehen. ich wil in nern, vor unrehtem strîte wern, swâ ich, hêrre, vor iuwern hulden mac. ûz schiltes ambet in einen sac wolt ich mich ê ziehen, sô verre ûz arde vliehen, dâ mich nieman erkande, ê daz ir iuwer schande, hêrre, an im begienget. güetlîcher ir enpfienget, billîcher alse, die her sint komen unde iuwern kumber hânt vernomen, danne daz ir si welt rouben. des sult ir mir gelouben.« Der vürste sprach: »nû lâz mich in sehen, dâ mac niht arges an geschehen.« er vuortin, dâ er Gawanen sach. zwei ougen unde ein herze jach, diu Lybaut mit brâhte dar, daz der gast wære wol gevar unde daz rehte manlîche site sînen gebærden wonte mite.