*D Dô sprach Poydiconjunz zem herzogen von Lanverunz: »geruochet ir mîn niht bîten, sô ir vart durch rüemen strîten, sô wænet ir, daz sî guot getân? hie ist der werde Laheduman unt ouch Meljacanz, mîn sun. swaz die bêde solden tuon unt ich selbe, ir möhtet dâ strîten sehen, ob ir strîten kündet spehen. ine kum niemer von dirre stat, ine mache uns alle strîtes sat, oder mir gebent man unt wîp her ûz gevangen ir bêder lîp.« Dô sprach der herzoge Astor: »hêrre, iwer neve was dâ vor, der künec, unt al sîn her von Liz. solt iwer her an slâfes vlîz die wîle sich hân gekêret? habt ir uns daz gelêret, sô slâf ich, dâ man strîten sol. ich kan bî strîte slâfen wol. doch gloubet mir daz, wære ich niht komen, Die burgære heten dâ genomen vrumen unt prîs zir handen. ich bewar iuch dâ vor schanden. durch got, nû senftet iwern zorn! dâ ist mêr gewunnen dan verlorn von iwerre messenîe, wils jehen vrou Obie.«

*m dô sprach Poidiconiunz zem herzogen von Laverunz: »geruochet ir mîn niht bîten, sô ir vart durch rüemen strîten, ir wænet, daz ez sî guot getân? hie ist der werde Laheduman und ouch Meliaganz, mîn sun. waz die beide solten tuon und ich selbe, ir möht dâ strîten sehen, ob ir strîten kündet spehen. ich kume niemer von dirre stat, ich mach uns alle strîtes sat, oder mir gebent man und wîp her ûz gevangen beider lîp.« dô sprach der herzoge Astor: »hêrre, iuwer neve was dâ vor, der künic, und allez sîn her von Liz. solt iuwer her an slâfens vlîz die wîle sich hân gekêret? habet ir uns daz gelêret, sô slâf ich, dâ man strîten sol. ich kan bî strîte slâfen wol. doch gloubet mir, wær ich niht komen, die burgære heten dâ genomen vromen und prîs zuo ir handen. ich bewar iuch dâ vor schanden. durch got, nû senftet iuwern zorn! dâ ist mê gewunnen danne verlorn von iuwerre massenîe, wil es jehen vrowe Obie.«

*G Dô sprach Poydeconiunz zem herzogen von Lanvarunz: »geruocht ir mîn niht bîten, sô ir vart durch rüemen strîten, sô wænet ir, daz sî guot getân? hie ist der grâve Lachdoman. hie ist ouch Meliahganz, mîn sun. swaz die bêde solden tuon unde ich selbe, ir möht doch strîten sehen, obe ir strîten kündet spehen. ich kum nimer von dirre stat, ich engemache iuch alle vehtens sat, oder mir gît man unde wîp her ûz gevangen bêde ir lîp.« dô sprach der herzoge Astor: »hêrre, iwer neve was dâ vor, der künic, unde al sîn her von Liz. solt iwer her an slâfes vlîz die wîle sich haben gekêrt? habet ir uns daz gelêrt, sô slâfe ich, swâ man strîten sol. ich kan bî strîte slâfen wol. nû wizzet daz, wære ich niht komen, die burgære heten genomen vrum unde brîs ze ir handen. ich bewarte iuch dâ vor schanden. durch got, nû senftet iwern zorn! hiest mê gewunnen dane verlorn von iwere messenîe, wils jehen Obie.«

*T Dô sprach Poydekuniunz zem herzogen von Lunverunz: »geruochet ir mîn niht bîten, swenn ir vart ze strîten, sô wænt ir, daz sî guot getân? hie ist der grâve Lachdoman unde Melyahganz, mîn suon. swaz die beide solten tuon unde ich selbe, ir möht doch strîten sehen, ob ir strîten künnet spehen. ichn kume niemer von dirre stat, ine mache uns alle vehtens sat, oder mir gît man unde wîp her ûz gevangen ir beider lîp.« Dô sprach der herzoge Astor: »hêrre, iuwer neve was hie vor, der künec, unde alsîn her von Liz. solte iuwer her an slâfes vlîz die wîle hân gekêret? habt ir uns daz gelêret, sô slâfich, swâ man strîten sol. ich kan bî strîte slâfen wol. unde wizzet daz, wære ich niht komen, die burgære heten genomen vromen unde prîs zir handen. ich bewartiuch dâ vor schanden. durch got, senftet iuwern zorn! hie ist mêr gewunnen danne verlorn von iuwerre massenîe, wil es jehen Obie.«