*D Gawan bôt des manegen eit, swaz volkes dâ vür in gereit, daz er des niht erkande. er sprach: »mîn varn hât schande, sît ich mit wârheit niht darf jehen, daz ich ir keinen habe gesehen vor disem tage an keiner stat, swar man mîn dienst ie gebat.« Der knappe sprach ze Gawan: »hêrre, sô hân ich missetân. ich soldez iu ê hân gesagt. dô was mîn bezzer sin verzagt. nû rihtet mîne schulde nâch iwer selbes hulde. ich solz iu dar nâch gerne sagen. lât mich mîn unvuoge ê klagen.« »Junchêrre, nû sagt mir, wer si sîn, durch iwern zuhtebæren pîn.« »hêrre, sus heizet der vor iu vert, dem doch sîn reise ist unerwert, der künec Poydiconjunz unt der herzoge Astor von Lanverunz. dâ vert ein unbescheiden lîp, dem minne nie gebôt dehein wîp. er treit der unvuoge kranz unt heizet Meljacanz. ez wære wîb oder magt, swaz er dâ minne hât bejagt, die nam er gar in nœten. man solt in drumbe tœten.

*m Gawan bôt des sînen eit, waz volkes dâ vür in gereit, daz er des niht erkande. er sprach: »mîn varn hât schande, sît ich mit wârheit niht mac jehen, daz ich ir keinen hân gesehen vor disem tage an keiner stat, war man mîn dienest ie gebat.« der knappe sprach ze Gawan: »hêrre, sô hân ich missetân. ich solte es iu ê hân gesaget. dô was mîn bezzer sin verzaget. nû rihtet mîne schulde nâch iuwer †seldes† hulde. dar nâch sol ich iu gerne sagen. lât mich mîn ungevüege ê klagen.« »junchêrre, sagt mir, wer si sîn, durch iuwer zuhtbære pîn.« »Hêrre, sus heizet der vor iu vert, dem doch sîn reise ist unerwert, rois Poidiconiunz und ouch Astor de Laverunz. dâ vert ouch ein unbescheiden lîp, dem minne nie gebôt kein wîp. er treit der ungevüege kranz und †† Meliaganz. ez wære wîp oder magt, waz er dâ minne hât bejagt, die nam er gar in nœten. man solt in drumbe tœten.

*G Gawan bôt des manigen eit, swaz volkes dâ vür in gereit, daz er des niht erkande. er sprach: »mîn varen hât schande, Sît ich mit wârheit niht mac jehen, daz ich ir deheinen habe gesehen vor disem tage an deheiner stat, swar man mîn dienst ie gebat.« der knappe sprach ze Gawan: »hêrre, sô hân ich missetân. ich soltz iu ê hân gesaget. dô was mîn bester sin verzaget. nû rihtet mîne schulde nâch iwer selbes hulde. ich solz iu dar nâch gerne sagen. lât mich mîn ungevüege ê klagen.« »junchêrre, saget mir, wer si sîn, durch iweren zuhtbæren pîn.« »hêrre, sus heizet der vor iu vert, dem noch sîn reise ist unerwert, roys Poydeconiunz unde duc Astor de Lanvarunz. dâ vert ein unbescheiden lîp, dem minne nie gebôt dehein wîp. er treit der ungevüege kranz unde heizet Meliahganz. ez wære wîp oder maget, swaz er dâ minne hât bejaget, die nam er gar in nœten. man solt in drumbe tœten.

*T Gawan bôt des manegen eit, swaz volkes dâ vor im reit, daz er des niht erkande. er sprach: »mîn varn hât schande, sît ich mit wârheit niht mac gejehen, daz ich ir keinen habe gesehen vor disem tage an deheiner stat, swar man mîn dienst ie gebat.« Der knappe sprach ze Gawan: »hêrre, sô hân ich missetân. ich soltes iu ê hân gesaget. dô was mîn bester sin verzaget. nû rihtet mîne schulde nâch iuwer selbes hulde. ich sols iu dar nâch gerne sagen. lât mich mîn unvuoge ê klagen.« »Junchêrre, nû sage mir, wer si sîn, durch iuwern zuhtebæren pîn.« »Hêrre, sus heizet der vor iu vert, dem doch sîn reise ist unerwert, Roys Poydekuniuns unde duc Astor de Lunveruns. dâ vert ein unbescheiden lîp, dem minne nie gebôt dehein wîp. er treit der unvuoge kranz unde heizet Melyahganz. ez wære wîp oder maget, swaz er dâ minne hât bejaget, die nam er gar in nœten. man solt in drumbe tœten.