*D Sine mugen niht langer hie gestên, ez muoz nû an ein scheiden gên. dô sprach der Waleise zArtuse dem Berteneise unt zen rittern unt zen vrouwen, er wolde ir urloup schouwen unt mit ir hulden vernemen. des moht êt niemen dâ gezemen, daz er sô trûrec von in reit. ich wæne, daz was in allen leit. Artus lobt im an die hant, kœme iemer in sölhe nôt sîn lant, als ez von Clamide gewan, des lasters wolder pflihte hân. im wære ouch leit, daz Læhelin im næme zwô rîche krône sîn. vil dienstes im dâ maneger bôt. den helt treip von in trûrens nôt. Vrou Cunneware, diu clâre magt, nam den helt unverzagt mit ir hant unt vuort in dan. dô kusten mîn hêr Gawan. Dô sprach der manlîche ze dem helde ellens rîche: »ich weiz wol, vriwent, daz dîn vart gein strîtes reise ist ungespart. dâ geb dir got gelücke zuo unt helfe ouch mir, daz ich getuo dir noch den dienst, als ich kan gern. des müeze mich sîn kraft gewern.«

*m Sine megen niht langer hie gestên, ez muoz nû an scheiden gên. dô sprach der Waleise †† Artuse dem Brituneise und ze ritteren und vrouwen, er wolte ir urloup schouwen und mit ir allen hulden nemen. des enmoht eht niemen dâ gezemen, daz er sô trûric von in reit. ich wæne, daz was in allen leit. Artus lobete im an die hant, kæme iemer in soliche nôt sîn lant, als ez von Clamide gewan, des lasters wolte er pflihte hân. ime wære ouch leit, daz Lehelin im næme zwô krône sîn. vil dienstes ime dâ maniger bôt. den helt treip von in trûrens nôt. vrouwe Cunneware, diu clâre maget, nam den helt unverzaget an ir hant und vuorte in dan. dô kuste in mîn hêrre Gawan und sprach gezogenlîche ze dem helde ellens rîche: »ich weiz wol, vriunt, daz dîn vart gegen strîtes reise ist ungespart. dâ gebe dir got glücke zuo und helfe ouch mir, daz ich getuo dir noch den dienest mîn, des ich ger, des mich des gotes kraft gewer.«

*G Sine mugen niht langer sô gestân, ez muoz an ein scheiden gân. dô sprach aber der Waleis Ze Artus dem Britaneis, ze rîteren unde ze vrouwen, er wolt ir urloup schouwen unde mit ir hulden vernemen. des dorfte niemen dâ gezemen, daz er sô trûric von in reit. ich wæne, ez was in allen leit. Artus lobte im an die hant, kœme immer in solhe nôt sîn lant, als ez von Clamide gewan, des kumbers wolter pflihte hân. im wære ouch leit, daz Lehelin im næme zwô rîche krône sîn. vil dienstes im dâ maniger bôt. den helt treip von in trûrens nôt. vrou Kuneware, diu clâre maget, nam den helt unverzaget mit ir unde vuort in dan. dô kust in mîn hêr Gawan unde sprach manlîche ze dem helde ellens rîche: »vriunt, ich weiz wol, daz dîn vart gein strîtes reise ist ungespart. dâ gebe dir got gelücke zuo unde helfe ouch mir, daz ich getuo dir noch den dienst, als ich kan geren. des müeze mich sîn kraft geweren.«

*T Si mugen niht langer sus gestân, ez muoz nû an ein scheiden gân. Dô sprach der Waleis ze Artuse dem Brituneis unde ze rîtern unde ze vrouwen, er wolt ir urloup schouwen unde mit ir hulden vernemen. ez endorfte niemen dâ gezemen, daz er sô trûric von in reit. ich wæne, ez wære in allen leit. Artus lobetim an die hant, kæme iemer in solhe nôt sîn lant, als ez von Clamide gewan, des kumbers wolt er pflihte hân. im wære ouch leit, daz Lehelin im næme zwô rîche krônen sîn. Vil dienstes im dâ maneger bôt. in treip von in dâ trûrens nôt. Vrou Cunneware, diu clâre maget, nam den helt unverzaget an ir hant unde vuortin dan. Dô kustin mîn hêr Gawan. dô sprach der manlîche ze dem degene ellens rîche: »helt, ich weiz wol, daz dîn vart gegen strîtes reise ist ungespart. dâ gebe dir got glücke zuo unde helf ouch mir, daz ich getuo dir noch dienst, als ich kan gern. des müeze mich sîn kraft gewern.«