*D Von der suone wurden naz der küneginne ougen umbe daz, wande Ithers tôt tet wîben wê. man sazte den künec Clamide an daz uover zuo dem Plimizœl. bî dem saz Jofreit fiz Idœl. zwischen Clamide unt Gawan der Waleis sitzen muose hân. als mir diu âventiure maz, an disem ringe niemen saz, der muoter brust ie gesouc, des werdecheit sô lützel trouc, wan kraft mit jugent wol gevar der Waleis mit im brâhte dar. Swer in ze rehte wolde spehen, sô hât sich manec vrouwe ersehen in trüeber glase, denne wære sîn munt. ich tuon iu von sîme velle kunt an dem kinne unt an den wangen: sîn varwe zeiner zangen wære guot. si möhte stæte haben, diu den zwîvel wol hin dan kan schaben. ich meine wîp, die wenkent unt ir vriwentschaft überdenkent. sîn glast was wîbes stæte ein bant. ir zwîvel gar gein im verswant. ir sehen in mit triwe enpfienc. durch diu ougen in ir herze er gienc. Man unt wîp im wâren holt. sus het er werdecheit gedolt

*m von der suone wurden naz der küniginne ougen umbe daz, want Ithers tôt tet wîben wê. man sazzete den künic Clamide anz uover zuo dem Plimizol. bî dem saz Jofreit fiz Idol. zwischen Clamide und Gawan der Waleis sitzen muose hân. Als mir diu âventiure maz, an disem ringe niemen saz, der muoter brust ie gesouc, des werdicheit sô lützel trouc, wanne kraft mit jugende wol gevar der Waleis mit ime brâhte dar. wer in ze rehte wolte spehen, sô hât sich manic vrouwe ersehen in trüeber glas, danne wære daz sîn munt. ich tuon iu von sînem velle kunt an dem kinne und an den wangen: sîniu varwe ze einer zangen wær guot. si möht stæte haben, diu den zwîvel wol hin dan kan schaben. ich meine wîp, die wenkent und ir vriuntschaft überdenkent. sîn glast was wîbes stæte ein bant. ir zwîvel gar gegen ime verswant. ir sehen in mit triuwe enpfienc. durch ougen in ir herze er gienc. man und wîp ime wâren holt. sus het er werdicheit erholt. Parcifal, der werde degen, nû müeze sîn der ouch vürbaz pflegen, der sîn unz her gepflegen hât. des wirt nôt, wandez hie gât an soliche hovemære, der ich ze sagene wol enbære und mac es doch niht verdagen: man muoz vröude und unvröude sagen. Wie trûric uns diz mære tuo, dâ hœret iedoch ein swîgen zuo. nû merket ez mit schœnen siten: hie kumt ein maget zuo geriten,

*G Von dirre suone wurden naz der künigîn ougen umbe daz, wan Ithers tôt tet wîben wê. man sazte den künic Clamide an daz urvar zuo dem Blimzol. bî im saz Jofreit fis Idol. zwischen Clamide unde Gawan der Waleis sitzen muose hân. als mir diu âventiure maz, an dem ringe niemen saz, der muoter brust ie gesouc, des werdicheit sô wênic trouc. kraft mit jugende wolgevar der Waleis mit im brâhte dar. swer in ze rehte kunde spehen, sô hât sich manic vrouwe ersehen in trüeberem velle, dane wære sîn munt. ich tuon von sînem velle kunt an dem kinne unde an den wangen: sîn varwe zeiner zangen wære guot. diu möht stæte haben, die der zwîvel kunde dan hin schaben. ich meine wîp, die wenkent unt an ir vriuntschaft überdenkent. sîn glast was wîbes stæte ein bant. ir zwîvel gar gein im verswant. ir sehen in mit triwe enpfienc. durch diu ougen in ir herze er gienc. man unde wîp im wâren holt. sus het er werdicheit geholt

*T Von dirre suone wurden naz der küneginne ougen umb daz, wan Ithers tôt tet wîben wê. man sazte den künec Clamide herlîche bî dem Plymizol. bî dem saz Jofreit fis Idol. zwischen Clamide unde Gawan der Waleis sitzen muose hân. Als mir diu âventiure maz, an dem ringe niemen saz, der muoter brust ie gesouc, des werdecheit sô wênic trouc. kraft bî jugent wol gevar, die der Waleis mit im brâhte dar. Swerz rehte kunde spehen, sô hât sich manec vrouwe ersehen in trüeberm glase danne sîn munt. ich tuon von sînem velle kunt an dem kinne unde an den wangen: sîn varwe zeiner zangen wære guot. diu möhte stæte haben, die der zwîvel wol hin dan kan schaben. ich meine wîp, die wenkent unde an ir vriuntschaft überdenkent. sîn glast was wîbes stæte ein bant. der zwîvel gar gegen im verswant. ir sehen in mit triuwen enpfie. durch diu ougen in ir herze er gie. man unde wîp im wâren holt. sus het er werdecheit gedolt