*D Ouch moht ers sîn von schulden vrô. Parzival si werte dô. Nû râtet, hœret unt jeht, ob tavelrunde meg ir reht des tages behalden, wande ir pflac Artus, bî dem ein site lac: nehein rîter vor im az des tages, swenne âventiure vergaz, daz si sînen hof vermeit. im ist âventiure nû bereit. daz lop muose tavelrunde hân. swie si wære dâ ze Nantes lân, Man sprach ir reht ûf bluomen velt. dâne irte stûde noch gezelt. der künec Artus daz gebôt ze êren dem rîter rôt. sus nam sîn werdecheit dâ lôn. ein pfelle von Acraton, ûz heidenschefte verre brâht, wart zeime zil al dâ gedâht, niht breit, sinwel gesniten, al nâch tavelrunde siten, wande in ir zuht des verjach: nâch gegenstuole dâ niemen sprach. die gesitze wâren al gelîche hêr. der künec Artus gebôt in mêr, daz man werde rîter unt werde vrouwen an dem ringe müese schouwen. die man dâ gein prîse maz, magt, wîb unt man ze hove dô az.

*m ouch moht ers sîn von schulden vrô. Parcifal si werte dô. Nû râtet, hœret und jeht, ob tavelrunder muge ir reht des tages behalten, wand ir pflac Artus, bî dem ein site lac: ei, kein ritter vor im az des tages, wenne âventiure vergaz, daz si sînen hof vermeit. im ist âventiure nû bereit. daz lop muos tavelrunde hân. wie si ze Nantes wære verlân, man sprach ir reht ûf bluomen velt. dâ enirte stûde noch gezelt. der künic Artus daz gebôt ze êren dem ritter rôt. sus nam sîn werdicheit dâ lôn. ein pfelle von Acraton, ûz heidenschaft verre brâht, wart zeinem zil aldâ gedâht, niht breit, sinwel gesniten, al nâch der tavelrunde siten, wand in ir zuht des verjach: nâch gegenstuole dâ niemen sprach. diu gesæze wâren alle glîche und hêr. der künic Artus gebôt in mêr, daz man werde ritterschaft und vrouwen an dem ringe müese schouwen. die man dâ gegen prîse maz, magt, wîp und man dô ze hof az.

*G er mohts sîn von schulden vrô. Parzival si werte dô. nû sprechet, hœret unde jeht, obe tavelrunder muge ir reht des tages behalten, wand ir pflac Artus, bî dem ein site lac: dehein rîter vor im az des tages, sô âventiure vergaz, daz si sînen hof vermeit. im ist âventiure nû bereit. daz lop muose tavelrunder hân. swie si wære ze Nantis lân, man sprach ir reht ûf bluomen velt. dâne irte stûde noch gezelt. der künic Artus daz gebôt zêren dem rîter rôt. sus nam sîn werdicheit dâ lôn. ein pfelle von Acraton, ûz heidenschefte verre brâht, des was dâ zeinem zil gedâht, niht breit, sinewel gesniten, al nâch der tavelrunder siten, wan in ir zuht des verjach: nâch gegenstuole dâ niemen sprach. ir gesitz was algelîche hêr. der künic Artus gebôt in mêr, daz man werde rîter unde vrouwen an dem ringe solt schouwen. die man dâ gein brîse maz, maget, wîp unde man ze hove dô az.

*T des mohten si sîn von schulden vrô. Parcifal siz werte dô. Nû sprechet, hœret unde jeht, ob die tavelrunder muge ir reht des tages behalten, wan ir pflac Artus, bî dem ein site lac, daz dehein rîter vor im az des tages, swenner âventiur vergaz unde daz si sînen hof vermeit. Im ist âventiure nû bereit. daz lop muose tavelrunder hân. swie daz si wære ze Nantes lân, man sprach ir reht ûf bluomen velt. dâ enirrete stûde noch gezelt. der künec Artus daz gebôt zêren dem rîter rôt. Sus nam sîn werdecheit dâ lôn, einen pfelle von Acraton, ûz heidenschaft verre brâht. des was dâ zeinem zil gedâht, niht lanc, sinewel gesniten, al nâch der tavelrunder siten, wand in ir zuht des verjach: nâch gegenstuole niemen sprach. ir gesitz was glîche hêr. der künec Artus gebôt in mêr, daz man werde rîter unde vrouwen an dem ringe liezen schouwen. die man dâ gegen prîse maz, maget unde wîp ze hove az.