*D Parzival, der valscheit swant, sîn triwe in lêrte, daz er vant snêwec bluotes zeher drî, die in vor witzen machten vrî. sîne gedanke umben Grâl unt der küneginne glîchiu mâl, iewederz was ein strengiu nôt. an im wac vür der minnen lôt. wan trûren und minne brichet zæhe sinne. sol diz âventiure sîn? si möhten bêde heizen pîn. Küene liute solten Keien nôt klagen. sîn manheit im gebôt genendeclîche an manegen strît. man saget in manegen landen wît, daz Keie, Artuses scheneschalt, mit siten wære ein ribalt. des sagent in mîniu mære blôz: er was der werdecheit genôz. swie kleine ich des die volge hân, getriwe unt ellenthaft ein man was Keie, des giht mîn munt. ich tuon ouch mêre von im kunt. Artuses hof was ein zil, dar kom vremder ritter vil, die werden unt die smæhen, mit siten die wæhen. Swelher partierens pflac, der selbe Keien ringe wac;

*m Parcifal, der valscheit swant, sîn triuwe lêrt in, daz er vant sîne snêwige bluotes zeher drîe, die in vor witze machten vrîe. sîne gedank umb den Grâl und der künigîn glîchiu mâl, ietwederz was ein strengiu nôt. an ime wac vür der minnen lôt. trûren und minne brichet zæhe sinne. sol diz âventiure sîn? si möhten beide heizen pîn. küene liute solten Keien nôt klagen. sîn manheit im gebôt genendeclîch an manigen strît. man saget in manigen landen wît, daz Keie, Artuses schinschalt, mit siten wære ein ribalt. des sagent in mîniu mære blôz: er was der werdecheit genôz. wie kleine ich des die volge hân, getriuwe und ellenthaft ein man was Keie, des giht im mîn munt. ich tuon iu mêre von ime kunt. Artuses hof was ein zil, dar kômen vrömeder liute vil, die werden und die smæhen, mit siten die wæhen. welher partierens pflac, der selbe Keien ringe wac;

*G Parzival, der valscheit swant, sîn triwe in lêrte, daz er vant sîne bluotes zeher drî, die in machten witze vrî. sîn pensieren umbe den Grâl unt der künigîn gelîchiu mâl, ietwederz was ein strengiu nôt. an im wac vür der minnen lôt. trûren unde minne brichet zæhe sinne. sol daz âventiure sîn? si möhten beidiu heizen pîn. küene liute solten Kays nôt klagen. sîn manheit im gebôt genendiclîche an manigen strît. man saget in manigen landen wît, daz Kay, Artuses seneschalt, mit siten wære ein ribalt. des saget in mîn mære blôz: er was der werdicheit genôz. swie kleine ich des die volge hân, getriwe unde ellenthafter man was Kay, des giht im mîn munt. ich tuon noch mêr von im kunt. Artuses hof was ein zil, dar kom vremder liute vil, Die werden unde die smæhen, mit siten die wæhen. swelher partierns pflac, der selbe Kay ringe wac;

*T Parcifal, der valscheit swant, sîn triuwe lêrtin, daz er vant sîn pensieren umbe den Grâl unde der küneginne glîchiu mâl, ietwederz was ein strengiu nôt. an im wac vür der minnen lôt. trûren unde minne brichet zæhe sinne. sol diz âventiure sîn? sô möhten beide wol heizen pîn. Küene liute solten Keys nôt klagen. sîn manheit im gebôt genendeclîche an manegen strît. man saget in manegen landen wît, daz Key, Artuses seneschalt, mit siten wære ein ribalt. des saget in diz mære blôz: er was der werdecheit genôz. swie kleine ich des die volge hân, getriuwe unde ellenthaft ein man was Key, des giht im mîn munt. ich tuon von im die mære kunt. Artuses hof was ein zil, dar kom vremder liute vil, die werden unde die smæhen, mit siten die wæhen. swelher partiernes pflac, den selben Key ringe wac;