*D Daz ir den künec gelastert hât, welt ir mir volgen, sô ist mîn rât, unt dunket mich iwer bestez heil: nemt iuch selben an ein bracken seil unt lât iuch vür in ziehen. ir enmegt mir niht enpfliehen, ich bringe iuch doch betwungen dar, sô nimt man iwer unsanfte war.« Den Waleis twanc der minnen kraft swîgens. Keie sînen schaft ûf zôch unt vrumt im einen swanc anz houbt, daz der helm erklanc. dô sprach er: »dû muost wachen. âne lînlachen wirt dir dîn slâfen hie benant. ez zilt al anders hie mîn hant: ûf den snê dû wirst geleit. der den sac von der mül treit, wolte man in sô bliwen, in möhte lazheit riwen.« Vrou Minne, hie seht ir zuo. ich wæne, manz iu ze laster tuo, wan ein gebûr spræche sân: »mîme hêrren sî diz getân.« er klaget ouch, möht er sprechen. vrou Minne, lât sich rechen den werden Waleise, wan liez in iwer vreise unt iwer strenge, unsüezer last, ich wæne, sich werte dirre gast.

*m daz ir den künic gelastert hât, wellet ir mir volgen, sô ist mîn rât, und dunket mich iuwer bestez heil: nemt iuch selben an ein bracken seil und lât iuch vür in ziehen. ir enmuget mir niht enpfliehen, ich enbringe iuch doch betwungen dar, sô nimt man iuwer sanfte war.« Den Waleis twanc der minnen kraft swîgens. Keie sînen schaft ûf zôch und vrumtim einen swanc anz houbet, daz der helm erklanc. er sprach: »dû muost wachen. âne lînlachen wirt dir dîn slâfen hie benant. ez zilt al anders mîn hant: ûf den snê dû wirst geleit. der den sac zuo der mülen treit, wolte man in alsô bliuwen, in möhte lazheit riuwen.« vrouwe Minne, hie seht ir zuo. ich wæne, man ez iu ze laster tuo, wanne ein gebûre, der spræche sân: »mînem hêrren sî diz getân.« er klagete, möhter sprechen. vrouwe Minne, lât sich rechen den werden Waleise, wan lieze in iuwer reise und iuwer strenge, unsüezer last, ich wæne, sich werte dirre gast.

*G daz ir den künic gelastert hât, welt ir im wandelen, sô ist mîn rât, unt dunkt mich iuwer bestez heil, ir nemet iuch an ein bracken seil unde lât iuch vür in ziehen. ir enmuget mir niht enpfliehen, ich bringe iuch doch gevangen dar, sô nimet man iuwer unsanfte war.« den Waleis twanc der minnen kraft swîgens. Kay sînen schaft ûf zôch unde vrumt im einen swanc ûf daz houbet, daz der helm erklanc. dô sprach er: »dû muost wachen. âne lîlachen wirt dir dîn slâfen hie benant. ez zilt al anders mîn hant: ûf den snê dû wirst geleit. der den sac von der müle treit, wolte man in alsus bliuwen, in möhte lazheit riuwen.« vrou Minne, hie seht ir zuo. ich wæne, man iuz ze laster tuo, wan ein gebûre spræche sân: »mînem hêrren sî diz getân.« er klagt ouch, möhter sprechen. vrou Minne, lât sich rechen den werden Waleise, wan lieze in iuwer vreise unt iuwer strenge, unsüezer last, ich wæne, sich werte dirre gast.

*T daz ir den künec gelestert hât, welt irz im wandeln, sô ist mîn rât, unde dûhte mich iuwer beste heil: nemt iuch an ein bracken seil unde lât iuch vür in ziehen. ir muget mir niht enpfliehen, ine bringiuch doch gevangen dar, sô nimt man iuwer unsanfte war.« Den Waleis twanc der minnen kraft. swîgende Key sînen schaft ûf zôch unde vrumt im einen swanc, daz im der helm ûf dem houbete erklanc. dô sprach er: »dû muost wachen. âne lîlachen wirt dir dîn slâf alhie benant. ez zilt al anders mîn hant: ûf den snê wirst dû geleit. Der den sac ze der müln treit, wolte man in alsus bliuwen, in möhte lazheit riuwen.« Vrou Minne, hie seht ir selbe zuo. ich wæne, manz iu ze laster tuo, wan ein gebûr spræche sân: »mînem hêrren sî daz getân.« Ir klagetet ouch, möht ir sprechen. vrou Minne, lât sich rechen den werden Waleise, wan liez in iuwer vreise unde iuwer strenger, unsüezer last, ich wæne, sich werte dirre gast.