*D Sît ich dir hie gelîchez vant. geêrt sî diu gotes hant unt al diu crêatûre sîn. Condwiramurs, hie lît dîn schîn, sît der snê dem bluote wîze bôt unt ez den snê sus machet rôt. Condwiramurs, dem gelîchet sich dîn bêâcurs; des enbistû niht erlâzen.« des heldes ougen mâzen, alsez dort was ergangen, zwêne zaher an ir wangen, den dritten an ir kinne. er pflac der wâren minne gein ir gar âne wenken. sus begunder sich verdenken, unze daz er unversunnen hielt. diu starke minne sîn dâ wielt. Sölhe nôt vuogte im sîn wîp. dirre varwe truoc gelîchen lîp von Pelrapeire diu künegîn; diu zucte im wizzenlîchen sin. sus hielt er, als er sliefe. wer dâ zuo zim liefe? Cunnewaren garzûn was gesant; der solde gegen Lalant. der sach an den stunden einen helm mit maneger wunden unt einen schilt gar verhouwen in dienste des knappen vrouwen.

*m sît ich dir hie glîchez vant. geêret sî diu gotes hant und alliu diu crêatûre sîn. Condwieramurs, hie lît dîn schîn, sît der snê dem bluote wîze bôt und ez den snê sus machet rôt. Condwieramurs, dem glîchet sich dîn bêâcurs; des enbistû niht erlâzen.« des heldes ougen mâzen, als ez dort was ergangen, zwêne zeher an ir wangen, den dritten an ir kinne. er pflac der wâren minne gegen ir gare âne wenken. sus begunde er sich verdenken, vür daz er unversunnen hielt. diu starke minne sîn dâ wielt. soliche nôt vuogete ime sîn wîp. dirre varwe truoc glîchen lîp von Pelraperie diu küniginne; diu zuckete ime wizzeclîch sinne. sus hielt er, als er sliefe. wer dâ †suoze† ime liefe? Cunnewaren garzûn was gesant; der solte gegen Lalant. der sach an den stunden einen helm mit maniger wunden und einen schilt gar verhouwen in dienste des knappen vrouwen.

*G sît ich dir hie gelîchez vant. geêret sî diu gotes hant unde al diu crêatûre sîn. Condwiramurs, hie lît dîn schîn, sît der snê dem bluote die wîze bôt unde ez den snê sô machet rôt. süeziu Condwiramurs, dem gelîchet sich dîn bêâcurs; des enbistû niht erlâzen.« des heldes ougen mâzen, wiez dort was ergangen, zwêne zeher an ir wangen, den dritten an ir kinne. er pflac der wâren minne gein ir âne wenken. sus begunder sich verdenken, sô daz er unversunnen hielt. diu starke minne sîn dâ wielt. alsolher nôt half im sîn wîp. dirre varwe truoc gelîchen lîp von Pelrapeire diu künigîn; diu zuct im wizzenlîchen sin. sus hielt er, alser sliefe. wer dâ zuo im liefe? Kunewaren garzûn was gesant; der solt gein Lalant. er sach an den stunden einen helm mit manigen wunden unde einen schilt verhouwen in dienste des knappen vrouwen.

*T sît ich dir hie wol glîches vant. geêret sî diu gotes hant unde al diu crêatûre sîn. Cundewiramurs, hie lît dîn schîn, sît der snê dem bluote wîze bôt unde ez den snê sô machet rôt. Cundewiramurs, dem glîchet sich dîn bêâcurs; des enbistû niht erlâzen.« des heldes ougen mâzen, wiez dort was ergangen, zwêne zeher an ir wangen unde den dritten an ir kinne. er pflac der wâren minne gegen ir âne wenken. sus begunder sich verdenken, sô daz er unversunnen hielt. diu starke minne sîn dâ wielt. alsolher nôt half im sîn wîp. dirre varwe truoc glîchen lîp von Peilraper diu künegîn; diu zuctim wizzenden sin. Sus hielt er, alser sliefe. wer dar zuo zim riefe? Cunnewaren garzûn was gesant; der solte gegen Lalant. der sach an der stunden einen helm mit manegen wunden unde einen schilt gar zerhouwen in dienste des knappen vrouwen.