*D der vürste kniete vor der magt. er sprach: »dû hâst al wâr gesagt, ich binz, dîn bruoder Orilus. der rôte rîter twanc mich sus, daz ich dir sicherheit muoz geben. dâ mit erkoufte ich dô mîn leben. die enpfâch, sô wirt hie gar getân, als ich gein im gelobt hân.« Doch enpfienc si triwe in wîze hant von im, der truoc den serpant, unt liezen ledec. dô daz geschach, dô stuont er ûf unde sprach: »Ich sol unt muoz durch triwe klagen: ouwê, wer hât dich geslagen? dîne slege tuont mir nimmer wol, wirts zît, daz ich die rechen sol, ich geinre den, swerz ruochet sehen, daz mir grôz leit ist dran geschehen. Ouch hilfet mirz klagen der küenste man, den muoter ie zer werlt gewan. der nennet sich ›der ritter rôt‹. hêr künec, vrou künegîn, er enbôt iu beiden samt dienest sîn, dar zuo benamen der swester mîn. er bitet sîn dienst iuch letzen unt dise magt ir slege ergetzen. Ouch het ichs dô genozzen gein dem helde unverdrozzen, wesser, wie si mich bestêt unt mir ir leit ze herzen gêt.«

*m Der vürste kniete vür die maget. er sprach: »dû hâst al wâr gesaget, ich binz, dîn bruoder Orilus. der rôte ritter twanc mich sus, daz ich dir muose sicherheit geben. dâ mit erkouft ich dô mîn leben. die enpfâch, sô wirt hie gar getân, als ich gegen ime gelobet hân.« dô enpfienc si triuwe in wîze hant von ime, der truoc den serpant, und liez in ledic. dô daz geschach, dô stuont er ûf und sprach: »ich sol und muoz von schulden klagen: swester, wer hât dich geslagen? dîne slege tuont mir niemer wol, wirt es zît, daz ich die rechen sol, ich geinre den, swerz ruochet sehen, daz mir grôz leit ist dran geschehen. ouch hilfet mirz klagen der küeneste man, den muoter ie zuo der werlt gewan. der nemmt sich ›der ritter rôt‹. hêr künic, vrouwe künigîn, er enbôt iu beiden sament den dienest sîn, dar zuo benamen der swester mîn. er bitte sînen dienst iuch letzen und dise maget ir slege ergetzen. ouch hete ichs dô genozzen gegen dem helde unverdrozzen, †weiz† er, wie si mich bestât und mir ir leit zuo herzen gât.«

*G der vürste kniete vür die maget. er sprach: »dû hâst al wâr gesaget, ich binz, dîn bruoder Orillus. der rôte rîter twanc mich sus, daz ich dir sicherheit muoz geben. dâ mit koufte ich dô mîn leben. die enpfâch, sô wirt hie gar getân, als ich gein im gelobet hân.« dô enpfie si triuwe in wîze hant von im, der truoc den serpant, unt lie in ledic. dô daz geschach, dô stuont er ûf unde sprach: »ich sol unde muoz mit triuwen klagen: owê, wer hât dich geslagen? dîne slege tuont mir niender wol, wirt es zît, daz ich dich rechen sol, ich innere den, swerz ruochet sehen, daz mir grôz leit ist dran geschehen. ouch hilfet mirz klagen der küenste man, den muoter ie zer werlt gewan. der nennet sich den rîter rôt. hêr künic unde vrou künigîn, er enbôt iu beidentsament den dienst sîn, dar zuo benamen der swester mîn. er bit iuch sîn dienst letzen und die maget ir slege ergetzen. ouch het ich es dô genozzen Gein dem helde unverdrozzen, wesser, wie si mich bestêt unde mir ir leit ze herzen gêt.«

*T Der vürste kniete vür die maget. er sprach: »dû hâst al wâr gesaget, ich bin dîn bruoder Orilus. der rôte rîter twanc mich sus, daz ich dir sicherheit muoz geben. dâ mit kouftich dô mîn leben. daz enpfâch, sô wirt hie gar getân, als ich gegen im gelobt hân.« Dô enpfienc si triuwe in wîze hant von dem, der truoc den serpant, unde liez in ledic. dô daz geschach, Dô stuont er ûf unde sprach: »Ich sol unde muoz durch triuwe klagen: ouwê, wer hât dich geslagen? dîne slege tuont mir niemer wol, wirt zît, daz ich dich rechen sol, ich geunêre den, derz ruochet sehen, daz mir grôz leit ist dran geschehen. ouch hilfet mirz klagen der küeneste man, den muoter ie zer werlt gewan. er nennet sich ›der rîter rôt‹. hêr künec, vrou künegîn, er enbôt iu beiden samt den dienst sîn, dar zuo benamen der swester mîn. er bittet iuch sînen dienst letzen, die magt der slege ergetzen. ouch hetichz dô genozzen gegen dem helde unverdrozzen, wesser, wie si mich bestêt unde mir ir leit ze herzen gêt.«