*D Merke diu wort unt wis der werke ein wer. des gib mir sicherheit al her.« dô sprach der herzoge Orilus zem künege Parzival alsus: »mac niemen dâ vür niht gegeben, sô leist ichz, wande ich wil noch leben.« durch die vorhte von ir man vrou Jeschute, diu wolgetân, strît scheidens gar verzagete, ir vîendes nôt si klagete. Parzival in ûf verliez, der vroun Jeschuten suone gehiez. Der betwungene vürste sprach: »vrouwe, sît diz durch iuch geschach, in strîte diu schumpfentiure mîn, wol her, ir sult geküsset sîn. ich hân vil prîses durch iuch verlorn. waz denne? ez ist doch verkorn.« Diu vrouwe mit ir blôzem vel was zem sprunge harte snel von dem pferde ûf den wasen. swie daz bluot von der nasen den munt im hete gemachet rôt, si kust in, dô er kusses gebôt. Dâ wart niht langer dô gebiten: si bêde unt ouch diu vrouwe riten vür eine klôsen in eines velses want. eine kefsen Parzival dâ vant. ein gemâlt sper dâr bî dâ lent. der einsidel, der hiez Trevrizent.

*m merke diu wort und wis der werke wer. des gip mir sicherheit alher.« Dô sprach der vürste Orilus zem künige Parcifale alsus: »mac niemen dâ vür niht gegeben, sô leist ichz, wand ich wil noch leben.« durch die vorhte von ir man vrouwe Jeschute, diu wol getân, strît scheidens gar verzagete, ir vîendes nôt si klagete. Parcifals in ûf verliez, der vrouwen Jeschuten suone gehiez. der betwungen vürste sprach: »vrouwe, sît diz durch iuch geschach, in strîte diu schumpfentiure mîn, wol her, ir sullet geküsset sîn. ich hân vil prîses durch iuch verlorn. waz danne? ez ist doch verkorn.« diu vrouwe mit ir blôzem vel was zuo dem sprunge harte snel von dem pferde ûf den wasen. wie daz bluot von der nasen den munt ime hete gemachet rôt, si küst in, dô er kus gebôt. Dâ wart niht langer dô gebiten: si beide und diu vrouwe riten vür eine klôsen in eines velses want. eine kafsen Parcifal dâ vant. ein gemâlet sper dâr bî dâ lent. der einsidel hiez Trevrizent.

*G Merke diu wort unt wis der werke ein wer. des gip mir sicherheit al her.« dô sprach der herzoge Orillus gein dem künige Parzivale sus: »mac niemen dâ vür niht gegeben, sô leist ich ez, wan ich wil noch leben.« durch vorhte von ir man vrou Jeschute wolgetân ir scheidens gar verzagte, ir vîndes nôt si klagte. Parzival in ûf verliez, dôr vroun Jeschuten hulde gehiez. der betwungene vürste sprach: »vrouwe, sît diz durch iuch geschach, in strîte diu schumpfentiure mîn, wol her, ir sult geküsset sîn. ich hân vil brîses durch iuch verloren. waz danne? ez ist iedoch verkoren.« diu vrouwe mit ir blôzem vel was zem sprunge harte snel von dem pferde ûf den wasen. swie daz bluot von der nasen den munt im het gemachet rôt, si küst in, dô er kus gebôt. ez wart niht lenger dô gebiten: si bêde unde ouch diu vrouwe riten zeiner klôsen in eines velses want. eine kefsen Parzival dâ vant. ein gemâlt sper dâr bî dâ lent. der einsidel hiez Trevrizzent.

*T merke diu wort unde wis der werke ein wer. des gip mir sicherheit alher.« Dô sprach der herzoge Orilus zem küenen Parcifale sus: »mac niemen dâ vür niht gegeben, sô leist ichz, wan ich wil noch leben.« Durch die vorhte ir man vrou Jeschute, diu wol getân, strît scheidens gar verzagete, ir vîendes nôt si klagete. Parcifal in ûf verliez, dô er vroun Jeschuten suone gehiez. Der betwungene vürste sprach: »vrouwe, sît durch iuch geschach in strîte diu schumpfentiure mîn, wol her, ir sult geküsset sîn. ich hân vil prîses durch iuch verlorn. waz danne? daz ist nû verkorn.« Diu vrouwe mit ir blôzem vel was zeinem sprunge harte snel von dem pferde ûf den wasen. swie im daz bluot von der nasen den munt hete gemachet rôt, si kustin, dô er kus gebôt. Dône wart niht lenger dâ gebiten: si beide unde ouch diu vrouwe riten zeiner klôsen in eines velses want. eine kafsen Parcifal dâ vant. ein gemâlet sper dâ bî lente. der einsidel hiez Trefrizente.