*D hât werdecheit an mir bezalt. nû erlâze mich, küener degen balt, suone gein disem wîbe unt gebiute mîme lîbe anders, swaz dîn êre sîn. gein der geunêrten herzogîn mag ich suone gepflegen niht, swaz halt anders mir geschiht.« Parzival, der hôch gemuot, sprach: »liute, lant noch varende guot, der decheinez mac gehelfen dir, dûne tuost des sicherheit gein mir, daz dû gein Bertane varst unt die reise niht langer sparst zeiner magt, die blou durch mich ein man, gein dem ist mîn gerich âne ir bete niht verkorn. dû solt der meide wol geborn sichern unt mîn dienest sagen oder wirde alhie erslagen. sage Artuse unt dem wîbe sîn, in beiden, von mir dienest mîn, daz si mîn dienst sus letzen unt die magt ir slege ergetzen. dar zuo wil ich schouwen in dînen hulden dise vrouwen mit suone âne vâre oder dû muost eine bâre tôt hinnen rîten, wiltû michs widerstrîten.

*m hât an mir werdecheit bezalt. nû erlâz mich, küener degen balt, suone gegen disem wîbe und gebiut mînem lîbe anders, waz dîn êre sîn. gegen der geunêrten herzogîn mac ich gepflegen suone niht, waz halt anders mir geschiht.« Parcifal, der hôchgemuot, sprach: »liute, lant noch varende guot, der dekeinez mac gehelfen dir, dû entuost des sicherheit gegen mir, daz dû gegen Britanie varst und die reise niht langer sparst ze einer maget, die blou durch mich ein man, gegen dem ist mîn gerich âne ir bete niht verkorn. dû solt der megde wol geborn sichern und mînen dienst sagen oder wirt dû alhie erslagen. sage Artuse und dem wîbe sîn, in beiden, von mir den dienest mîn, daz si mir dienest sus letzen und die maget ir slege ergetzen. dar zuo wil ich dise vrouwen in dînen hulden schouwen mit suone âne vâre oder dû muost eine bâre tôt von hinnen rîten, wilt dû michs widerstrîten.

*G hât an mir werdecheit bezalt. nû erlâ mich, küener degen balt, suone gein disem wîbe. gebiut mînem lîbe anders, swaz dîn êre sîn. gein der geunêrten herzogîn mag ich suone gepflegen niht, swaz halt anders mir geschiht.« Parzival, der hôchgemuot, sprach: »liute, lant noch varnde guot, der deheinez mac gehelfen dir, dûne tuost des sicherheit gein mir, daz dû gein Britanie varst unt die reise niht langer sparst gein einer meide, die blou durch mich ein man, gein dem ist mîn gerich âne ir bete niht verkoren. dû solt der meide wolgeboren sicheren unde mîn dienst sagen oder dû wirst al hie erslagen. sage Artuse unde dem wîbe sîn, in beiden, von mir dienst mîn, daz si mîn dienst sol letzen, die maget ir slege ergetzen. dar zuo wil ich beschouwen in dînen hulden dise vrouwen mit suone âne vâre ode dû muost eine bâre tôter hinnen rîten, wil dû mich es widerstrîten.

*T hât werdecheit an mir bezalt. nû erlâ mich, küener degen balt, suone gegen disem wîbe unde gebiut mînem lîbe anders, swaz dîn êre sîn. gegen der geunêrten herzogîn mag ich suone gepflegen niht, swaz joch anders mir geschiht.« Parcifal, der hôchgemuot, sprach: »liute, lant, varnde guot, der deheinez mac gehelfen dir, dûne tuost des sicher gegen mir, daz dû gegen Britanie varst unde dîne reise niht langer sparst gegen einer maget, die blou durch mich ein man, gegen dem ist mîn gerich unde mit ir bete niht verkorn. dû solt der megde wol geborn sichern unde mînen dienst sagen oder wirt alhie erslagen. sage Artuse unde dem wîbe sîn, in beiden, von mir den dienst mîn. bit si mîn dienst sus letzen, die maget ir slege ergetzen. dar zuo wil ich schouwen in dînen hulden dise vrouwen mit suone âne vâre oder dû muost eine bâre tôt von hinnen rîten, wilt dû mich widerstrîten.