*D swenne ich vliehen lerne, sô stirb ich als gerne.« Dô sprach diu blôze herzogîn: »er hât hie niemen denne mîn. der trôst ist kranc gein strîtes sige.« niht wan knoden unt der rige was an der vrouwen hemde ganz. wîplîcher kiusche lobes kranz truoc si mit armüete. si pflac der wâren güete, sô daz der valsch an ir verswant. die vintâlen er vür sich bant; gein strîte er wolde vüeren. den helm er mit den snüeren ebene ze sehene ructe. innen des daz ors sich bucte, gein dem pferde ez schrîen niht vermeit. der vor Parzivale dâ reit unt vor der blôzen vrouwen, der erhôrtez unt wolde schouwen, wer bî sîme wîbe rite. daz ors warf er mit zornes site vaste ûz dem stîge. gein strîteclîchem wîge hielt der herzoge Orilus, gereit zeiner tjost alsus mit rehter manlîcher ger von Gaheviez mit eime sper. daz was geverwet genuoc, reht als er sîniu wâpen truoc.

*m wanne wenne ich vliehen lerne, sô stirbe ich alsô gerne.« dô sprach diu grôze herzogîn: »er hât hie niemen danne mîn. der trôst ist kranc gegen strîtes sige.« niht wan knoden und der rige was an der vrouwen hemede ganz. wîplîcher kiusche lobes kranz truoc si mit armüete. si pflac der wâren güete, sô daz der valsch an ir verswant. die fantailen er vür sich bant; gegen strîte er wolt rüeren. den helm er mit den snüeren ebene ze sehen ruckete. innen des daz ros sich buckete, gegen dem pferde ez schrîen niht vermeit. der vor Parcifal dâ reit und vor der blôzen vrouwen, der erhôrte ez und wolte schouwen, wer bî sînem wîbe rite. daz ros warf er mit zornes site vaste ûz dem stîge. gegen strîteclîchem wîge hielt der herzoge Orilus, gereit ze einer just alsus mit rehter manlîcher ger von Gaheviez mit einem sper. daz was geverwet genuoc, reht alsô er sîniu wâpen truoc.

*G swenne ich vliehen lerne, sô stirbe ich als gerne.« dô sprach diu blôze herzogîn: »er hât hie niemens danne mîn. der trôst ist kranc gein strîtes sige.« niwan knoden unde der rige was an der vrouwen hemde ganz. wîplîcher kiusche lobes kranz truoc si mit armüete. si pflac der wâren güete, sô daz der valsch an ir verswant. die vinteilen er vür sich bant; gein strîter wolte vüeren. den helm mit den snüeren er ebene ze sehenne ructe. innen des daz ors sich bucte, mit dem pferde ez schrîen niht vermeit. der vor Parzivale dâ reit unde vor der blôzen vrouwen, der hôrte unde wolt schouwen, wer bî sînem wîbe rite. daz ors warf er mit zornes site vaste ûz dem stîge. gein strîticlîchem wîge hielt der herzoge Orillus, gereit zeiner tjoste sus mit rehter manlîcher ger von Kahaviez mit einem sper. daz was gevärwet genuoc, reht als er sîniu wâpen truoc.

*T swennich vliehen lerne, sô stirbich als gerne.« Dô sprach diu blôze herzogîn: »er hât hie niemen danne mîn. Der trôst ist kranc gegen strîtes sige.« niht wan knoden unde der rige was an der vrouwen hemde ganz. wîplîcher kiusche lobes kranz truoc si mit armüete. si pflac der wâren güete, sît daz der valsch an ir verswant. Die vinteilen er vür sich bant; gegen strîte er wolte rüeren. Den helm mit den snüeren er eben ze sehene dructe. innen des daz ors sich bucte, mit dem pferde ez schrîen niht vermeit. Der vor Parcifale dâ reit unde vor der blôzen vrouwen, der hôrte unde wolte schouwen, wer dâ bî sînem wîbe rite. daz ors warf er mit unsite ûzer dem stîge. gegen strîteclîchem wîge hielt der herzoge Orilus, der reit gegen einer tjost alsus mit rehter manlîcher ger von Kaheviez mit einem sper. daz was geverwet genuoc, reht als er sîn wâpen truoc.