*D Sô dâ gedienet wære. nû hœrt ein ander mære: hundert knappen man gebôt, die nâmen in wîze tweheln brôt mit zühten vor dem Grâle. die giengen al ze mâle unt teilten vür die taveln sich. man sagte mir - diz sag ouch ich ûf iwer ieslîches eit -, daz vorem Grâle wære bereit - sol ich des iemen triegen, sô müezet ir mit mir liegen -, swâ nâch jener bôt die hant, daz er al bereite vant spîse warm, spîse kalt, spîse niwe unt dar zuo alt, daz zam unt daz wilde. es enwürde nie dechein bilde, beginnet maneger sprechen. der wil sich übel rechen. Wan der Grâl was der sælden vruht, der werlde süeze alsölh genuht, er wac vil nâch gelîche, als man saget von himelrîche. In kleiniu goltvaz man nam, als ieslîcher spîse zam, salsen, pfeffer, agraz. dâ het der kiusche unt der vrâz alle gelîche genuoc. mit grôzer zuht manz vür si truoc.

*m sô dâ gedienet wære. nû hœret ein ander mære: hundert knappen man gebôt, die nâmen in wîze twehelen brôt mit zühten vorme Grâle. die giengen alle ze mâle. si teilten vür die tavelen sich. man sagete mir - nû sage ouch ich ûf iuwer ieglîches eit -, daz vorme Grâle wære bereit - sol ich des ieman triegen, sô müezet ir mit mir liegen -, wâ nâch jener bôt die hant, daz er albereit vant spîse warm, spîse kalt, spîse niuwe, dar zuo alt, daz zame und daz wilde. »es enwart nie kein bilde«, beginnet maniger sprechen. der wil sich unschœne rechen: wanne der Grâl was der sælden vruht, der werde, süeze, ein solich genuht! er wac vil nâch glîche, als man saget von himelrîche. in kleiniu goltvaz man nam, als ieglîcher spîse zam, salsen, pfeffer, agraz. dâ hete der kiusche und der vrâz alle wol gelîche genuoc. mit grôzer zuht manz vür si truoc.

*G sô gedienet wære. nû hœret anderiu mære: hundert knappen man gebôt, die nâmen in wîze twehelen brôt mit zühten vor dem Grâle. si giengen alzemâle unde teilten vür die tavelen sich. man seite mir - daz sage ouch ich ûf iuwer ieslîches eit -, daz vor dem Grâle was bereit - sol ich des iemen triegen, sô müezet ir mit mir liegen -, wan swâ nâch jener bôt die hant, daz erz albereit vant: spîse warm, spîse kalt, spîse niuwe, dar zuo alt, daz zam unde daz wilde. esne würde nie dehein bilde, beginnet maniger sprechen. der wil sich übel rechen. wan der Grâl was der sælden vruht, der werlde süeze ein solch genuht, er wac vil nâch gelîche, als man saget von himelrîche. in kleiniu goltvaz man nam, als ieslîcher spîse zam, salsen, pfeffer, agraz. dâ het der kiusche unde der vrâz alle gelîche genuoc. mit zühten manz vür si truoc.

*T sô dâ gedienet wære. Nû hœret ein ander mære: hundert knappen man gebôt, die nâmen in wîze tweheln brôt mit zühten vor dem Grâle. die giengen al zemâle unde teileten vür die taveln sich. man sagete mir - daz sage ouch ich ûf iuwer ieglîches eit -, daz vor dem Grâle wære bereit - sol ich des iemannen triegen, sô müezet ir mit mir liegen -, swâ nâch ieglîcher bôt die hant, daz er al bereit vant spîse warm, spîse kalt, spîse niuwe, spîse alt, daz zame unde daz wilde. ez enwürde nie kein bilde, beginnet maneger sprechen. der wil sich mit übele rechen. wan der Grâl was der sælden vruht, der werlte süeze ein solch genuht, er wac vil nâch gelîche, sô man saget von himelrîche. in kleiniu goltvaz man nam, als ieglîcher spîse zam, salsen, pfeffer, agraz. dâ hete der kiusche unde der vrâz alglîche genuoc. mit grôzer zuht man vür si truoc