*D Si nigen. ir zwô dô truogen dar ûf die taveln wol gevar daz silber unt leitenz nider. dô giengen si mit zühten wider zuo den êrsten zwelven sân. ob ich geprüevet rehte hân, hie sulen ahzehen vrouwen stên. Âvoy, nû siht man sehse gên in wæte, die man tiure galt. daz was halbez plîalt, daz ander pfelle von Ninnive. dise unt die êrsten sehse ê truogen zwelf röcke geteilet, gein tiwerer kost geveilet. Nâch den kom diu künegîn. ir antlütze gap den schîn, si wânden alle, ez wolde tagen. man sach die maget an ir tragen pfellel von Arabi. ûf einem grüenem achmardî truoc si den wunsch von pardîs, bêde wurzeln unt rîs: daz was ein dinc, daz hiez der Grâl, erden wunsches überwal. Repanse de schoye si hiez, die sich der Grâl tragen liez. der Grâl was von sölher art: wol muose ir kiusche sîn bewart, diu sîn ze rehte solde pflegen. diu muose valsches sich bewegen.

*m si nigen, ir zwô. dô truogen si dar ûf die tavelen wol gevar diu mezzer und leiten si nider und giengen dô mit zühten wider zuo den êrsten zwelven stân. ob ichz gebrüefet rehte hân, hie sullen ahzehen vrouwen stân. âvoy, nû siht man sehse gân in wæte, die man tiure galt. daz was halbez blîalt, daz ander pfelle von Ninive. dise und die êrsten sehse ê truogen zwelf röcke geteilet, gegen tiuren kost geveilet. nâch den kam diu künigîn. ir antlitze gap den schîn, si wânden al, ez wolte tagen. man sach die maget an ir tragen pfelle guot von Arabi. ûf einem grüenen achmardî truoc si den wunsch vom paradîs, beide wurzeln und rîs: daz was ein dinc, daz hiez der Grâl, erden wunsches überwal. Repanse de schoye si hiez, die sich †den† Grâl tragen liez. der Grâl was von solher art: wol muose ir kiusche sîn bewart, diu sîn ze rehte solde pflegen. si muose valsches sich bewegen.

*G ez nigen zwô unde truogen dar ûf die tavelen wol gevar daz silber unde leitenz nider. dô giengen si mit zühten wider zuo den êrsten zwelven stân. obe ichz geprüevet rehte hân, hie sulen ahzehen vrouwen stên. âvoy, nû siht man sehse gên in wæte, die man tiure galt. ez was halbez plîalt, daz ander pfelle von Ninve. dise unt die êrsten sehse ê truogen zwelf röcke geteilt, gein tiur kost geveilt. nâch den gie diu künigîn. der antlitze gap den schîn, si wânden alle, ez wolde tagen. man sach die maget an ir tragen pfelle von Arabis. ûf einem grüenen achmardîs truoc si den wunsch von pardîs, beidiu wurz unde rîs: daz was ein dinc, daz hiez der Grâl, erden wunsches überwal. Urrepanschoye hiez, die man den Grâl tragen liez. der Grâl was von solher art: wol muoser kiusche sîn bewart. diu sîn ze reht solte pflegen, diu muose valsches sich bewegen.

*T si nigen. dô truogen zwô dar ûf die taveln wol gevar daz silber unde legetens nider. mit grôzer zuht si giengen wider zuo den êrsten zwelven stân. Âvoy, nû siht man sehse gân in wæte, die man tiure galt. ez was halbez blîalt, daz ander was pfelle von Ninive. dise unde die êrsten sehse ê truogen zwelf röcke geteilet, gegen tiurer koste geveilet. Nâch den gie diu künegîn. der antlitze gap den schîn, si wânden alle, ez wolte tagen. man sach die maget an ir tragen pfelle von Arabi. ûf einem grüenen achmardî truoc si den wunsch von paradîs, beidiu wurzeln unde rîs: daz was ein dinc, daz heizet der Grâl, erden wunsches überwal. Repanse de joie si hiez, die sich der Grâl tragen liez. Der Grâl was von solher art: wol muose ir kiusche sîn bewart, diu sîn rehte solte pflegen. diu muose valsches sich bewegen.