*D Mit zuht si kunden wider gên, zuo den êrsten vieren stên. an disen aht vrouwen was röcke grüener denn ein gras, von Azagouc samît, gesniten wol lanc und wît. dâ mitten si zesamne twanc gürteln tiure, smal unt lanc. dise aht vrouwen kluoc, ieslîchiu ob ir hâre truoc ein kleine blüemîn schapel. der grâve Iwan von Nonel unt Jernis von Ril, jâ was über manege mîl ze dienste ir tohter dar genomen. man sach die zwô vürstîn komen in harte wünneclîcher wât. zwei mezzer snîdende als ein grât brâhten si durch wunder ûf zwein twehelen albesunder; daz was silber hert unt wîz. dâr an lag ein spæher vlîz: im was solch scherpfen niht vermiten, ez hete stahel wol versniten. Vorem silber kômen vrouwen wert, der dar ze dienste was gegert, die truogen lieht dem silber bî, vier kint vor missewende vrî. sus giengen si alle sehse zuo. nû hœret, waz ieslîchiu tuo:

*m mit zuht si kunden wider gên, zuo den êrsten vieren stên. an den ahte vrouwen was röcke grüener denne ein gras, von Adamach samît gesniten und lanc und wît. dâ mitten si zesamen twanc tiure gürtel smal und lanc. dise ahte juncvrouwen kluoc, ieglîchiu obe ir hâre truoc ein kleine bluomen schapel. der grâve Iwan von Nouel und Gernis von Rile, jâ was über manige mîle zuo dienste ir tohter dâ genomen. die zwô vürstinne sach man komen in harte minniclîcher wât. zwei mezzer schindende als ein grât brâhten si durch wunder ûf zweien twehelen besunder; diu wâren silberîn, herte und wîz. dâr an lac ein spæher vlîz: in was solichiu scherpfe niht vermiten, si heten stahel wol gesniten. vor den mezzeren kômen vrouwen wert, der dâ ze dienste was gegert, die truogen lieht den mezzeren bî, vier kint vor †ime iwende† vrî. sus giengen alle sehse zuo. nû hœret, waz ieglîchiu tuo:

*G mit zühten si kunden wider gên, zuo den êrsten vieren stên. an den ahte vrouwen was röcke grüener danne ein gras, von Azagouch samît, gesniten lanc unde wît. dâ enmitten si zesamne twanc gürtel tiur, smal unde lanc. die ahte juncvrouwen kluoc, ieslîchiu obe ir hâre truoc ein kleine blüemîn schapel. der grâve Iwein von Nonel unde Kernis von Rile, ez was über manige mîle ze dienst ir tohter dar genomen. man sach die zwô vürstinne komen in harte wünniclîcher wât. zwei mezzer snîdende als ein grât truogen si durch wunder in zwein twehelen al besunder; diu wâren von silber wîz. dâr an lag ein spæher vlîz: In was ir scherpfe niht vermiten, si heten stâl wol versniten. vor dem silber kômen vrouwen wert, der dar ze dienste was gegert, die truogen lieht dem silber bî, vier kint vor missewende vrî. die giengen alle viere zuo. nû hœret, waz iegelîchiu tuo:

*T Mit zühten si kunden wider gân, zuo den êrsten vieren stân. röcke grüener dannein gras an disen ahte vrouwen was, von Azagouc samît, gesniten lanc unde wît. dâ mitten si zesamne twanc gürtele tiure unde lanc. dise ahte juncvrouwen kluoc, ieslîchiu ob ir hâre truoc ein kleine blüemîn schapel. Der grâve Iwan von Jonel unde Scharius von Rile, ze dienste über manege mîle wâren ir tohtere dar genomen. man sach die zwô vürstinne komen in harte wünneclîcher wât. Zwei mezzer snîdende als ein grât brâhten si durch wunder ûf zwein tweheln wîz besunder; ez was silber harte wîz. dâr an lac ein spæher vlîz: im was solh scherpfe niht vermiten, ez hete stahel wol gesniten. Vor dem silber kômen vrouwen wert, der was ze dienste dar gegert: vier kint vor missewende vrî, die truogen lieht dem silber bî. Sus giengen salle sehse zuo. nû hœret, waz ieglîchiu tuo: