*D Nâch den kom ein herzogîn unt ir gespil. zwei stöllelîn si truogen von helfenbein. ir munt nâch viwers rœte schein. die nigen alle viere. zwô sazten schiere vür den wirt die stollen. dâ wart gedient mit vollen. die stuonden ensamt an eine schar unt wâren alle wol gevar. den vieren was gelîch ir wât. nû seht, wâ sich niht versûmet hât ander vrouwen vierstunt zwuo. die wâren dâ geschaffet zuo: viere truogen kerzen grôz. die anderen viere niht verdrôz, sine trüegen einen tiuren stein, dâ tages diu sunne lieht durchschein. dâ vür was sîn name erkant: ez was ein grânât jâchant, beide lanc unt breit. durch die lîhte in dünne sneit, swer in zeime tische maz. dâ obe der wirt durch rîcheit az. Si giengen harte rehte vür den wirt al ehte. gein nîgen si ir houbet wegeten. viere die taveln legeten ûf helfenbein wîz als ein snê, stollen, die dâ kômen ê.

*m nâch den zwein kam ein herzogîn und ir gespil. zwei stöllelîn si truogen von helfenbein. ir munt nâch viures rœte schein. die nigen alle viere. zwô sasten schiere vür den wirt die stollen. dâ wart gedienet mit vollen. die stuonden samet an einer schar und wâren alle wol gevar. disen vieren was gelîch ir wât. seht, wâ sich niht versûmet hât anderre vrouwen vierstunt zwô. den was geboten alsô, daz ir viere truogen kerzen grôz. die anderen viere niht verdrôz, si trüegen einen tiuren stein, dâ tages diu sunne lieht durchschein. dâ vür was sîn name erkant: ez was ein grânât jâchant, beide lanc und breit. durch die lîhte in dünne sneit, wer in ze einem tische maz. dar abe der wirt durch eine rîcheit az. si giengen harte rehte vür den wirt alle ehte. gegen nîgen si ir houbet wegeten. viere die tavelen legeten ûf stollen, die dâ kômen ê, helfenbeinîn wîz als ein snê.

*G nâch der gienc ein herzogîn unde ir gespil. zwei stöllelîn si truogen von helfenbein. ir munt nâch viures rœte schein. die nigen alle viere. die zwô sazten schiere vür den wirt die stollen. dâ wart gedient mit vollen. si stuonden sament an einer schar unde wâren alle wolgevar. den vieren was gelîch ir wât. seht, wâ sich niht versûmet hât anderre vrouwen vierstunt zwô. die wâren dâ geschaffet zuo: viere truogen kerzen grôz. die anderen viere niht verdrôz, sine trüegen einen tiuren stein, dâ tages diu sunne lieht durchschein. dâ vür was sîn name erkant: ez was ein grânât jâchant, beidiu lanc unde breit. durch die lieht in dünne sneit, swer in zeinem tische maz. dar abe der wirt durch rîcheit az. Si giengen alle rehte vür den wirt alle ehte. gein nîgen si ir houbt wegeten. vier die tavelen legeten ûf helfenbein wîz als ein snê, die stollen, die kômen ê.

*T Nâch den zwein gienc ein herzogîn unde ir gespil. zwei stöllelîn truogen si von helfenbein. ir munt nâch viures rœte schein. die nigen alle viere. die zwô sazten schiere vür den wirt die stollen. dâ wart gedient mit vollen. si stuonden samt an eine schar. si wâren alle wol gevar. Den vieren was glîche ir wât. seht, wâ sich niht versûmet hât ander juncvrouwen vierstunt zwô. die wâren dâ geschaffet zuo, daz si truogen kerzen grôz. die andern viere niht verdrôz, sine trüegen einen tiuren stein, dâ tages diu sunne lieht durchschein. des name was dâ vür erkant: ez was ein grânât jâchant, beidiu lanc unde breit. durch die lîhte in dünne sneit, swer in zeinem tische maz. dâr obe der wirt durch rîcheit az. die giengen harte rehte vür den künec alle ehte. durch nîgen sir houbet wegeten. viere die taveln legeten ûf helfenbein wîz als ein snê, stollen, die dâ kômen ê.