*D Der wirt het durch siecheit grôziu viwer unt an im warmiu kleit. wît unt lanc zobelîn, sus muose ûzen unt innen sîn der bellîz unt der mantel drobe. der swecheste balc wære wol ze lobe, der was doch swarz unt grâ. des selben was ein hûbe aldâ ûf sîme houbte, zwivalt von zobele, den man tiure galt. sinwel arabesch ein borte oben drûf gehôrte, mitten dran ein knopfelîn, ein durchliuhtic rubîn. dâ saz manec ritter kluoc, dâ man jâmer vür si truoc. ein knappe spranc zer tür dar în, der truog eine glevîn. der site was ze trûren guot: an der snîden huop sich bluot unt lief den schaft unz ûf die hant, dârz in dem ermel widerwant. Dâ wart geweinet unt geschrît ûf dem palase wît. daz volc von drîzec landen möhtez den ougen niht enblanden. er truoc si in sînen henden alumbe zen vier wenden unz aber wider zuo der tür. der knappe spranc hin ûz dar vür.

*m und hete durch sîne siecheit grôziu viure und warmiu kleit. wît und lanc zobelîn, sus muose ûzen und inne sîn ein belz und ein mantel drobe. der swecheste balc wær wol ze lobe, der was doch swarz und grâ. des was ein hûbe dâ ûf sînem houbete, zwivalt von zobele, den man tiure galt. sinewel arabisch ein borte oben dar ûf gehôrte, mitten dran ein knopfelîn, ein durchliuhtic rubîn. dâ saz manic ritter kluoc, dâ man jâmer vür si truoc. ein knappe spranc zer tür her în, der truoc ein glevîn. der site was ze trûren guot: an der snîden huop sich bluot und lief den schaft unz an die hant, dârz in dem ermel widerwant. dâ wart geweinet und geschrît ûf dem palase wît. daz volc von drîzic landen möht ez den ougen niht enblanden. er truoc si in sînen henden al umbe zen vier wenden unz aber wider zuo der tür. der knappe spranc hin ûz dar vür.

*G der wirt hete durch siecheit grôziu viur unde warmiu kleit. wît, lanc zobelîn, sus muose ûzen unde innen sîn ein belz unde ein mandel drobe. der swecheste balc was wol ze lobe, der was doch swarz unde grâ. des selben was ein hûbe dâ ûf sînem houbte, zwivalt von zobele, den man tiure galt. sinewel arabesch ein borte oben drûf gehôrte; dâr an was ein knopfelîn, ein durchliuhtic rubîn. dâ saz manic rîter kluoc, dâ man jâmer vür si truoc. ein knappe spranc zer tür her în, der truoc eine glevîn. der site was ze trûren guot: an der snîden huop sich bluot unde lief den schaft unze an die hant, daz an dem ermel widerwant. dâ wart geweinet unde geschrît in dem palase wît. daz volc von drîzic landen möhtez den ougen niht enblanden. Er truoc si in sînen henden Ze allen vier wenden unze aber wider hin zer tür. der knappe spranc hin ûz dar vür.

*T Der wirt hete durch siecheit grôz viur unde an im warmiu kleit. wît unde lanc zobelîn, als muose ûz unde inne sîn der bellez unde der mantel drobe. der swechste balc wære wol ze lobe, der was doch swarz unde grâ. des selben was ein hûbe dâ ûf sînem houbete, zwivalt von zobele, den man tiure galt. sinewel ein arabesch borte oben drûf hôrte, enmitten dran ein knopfelîn, ein durchliuhtic rubîn. dâ was manec rîter kluoc, dâ man jâmer vür si truoc. Ein knappe spranc zer tür dar în, der truoc eine glevîn. des site was ze trûrene guot: oben an der snîden erhuop sich bluot unde lief den schaft nider unz ûf die hant, daz sin dem ermele erwant. Dô wart geweinet unde geschrît in dem palase wît, daz von drîzic landen möhtens niht den ougen enblanden. er truoc si in sînen henden alumbe ze vier wenden unde aber wider zuo der tür. der knappe spranc hin ûz zer tür.