*D Ie vier gesellen sundersiz. dâ zwischen was ein underviz, dâr vor ein teppech sinewel. fillu roy Frimutel mohte wol geleisten daz. eines dinges man dâ niht vergaz: sine hete niht betûret, mit marmel was gemûret drî vierecke viwerram. dâr ûffe was des viwers nam, holz hiez ›lign âlôê‹. sô grôziu viwer sît noch ê sach niemen hie ze Wildenberc. jenez wâren kostelîchiu werc. Der wirt sich selben setzen bat gein der mitteln viwerstat ûf ein spanbette. ez was worden wette zwischen im unt der vröude; er lebte niht wan töude. In den palas kom gegangen, der dâ wart wol enpfangen, Parzival, der lieht gevar, von im, der in sante dar. der liez in dâ niht langer stên. in bat der wirt nâher gên unt sitzen: »zuo mir dâ her an. sazte ich iuch verre dort hin dan, daz wære iu alze gastlîch«, sus sprach der wirt jâmers rîch.

*m ie vier gesellen sundersiz. dâ enzwischen was ein underviz, dâr vor ein teppich sinewel. fili rois Frimutel mohte wol gelusten daz. eines dinges man dâ niht vergaz: si hete niht betûret, mit marmel was gemûret drî vierecke viurrame. dâr ûf was des viures name, holz hiez ›lingnum âlôê‹. sô grôz †viurer† sît noch ê sach niemen hie ze Wildenberc. jenez wâren kostlîchiu werc. Der wirt sich selben setzen bat gegen der mittelen vürsten stat ûf einem spanbette. es was worden wette zwischen ime und der vröude; er lebete niht wen töude. in den palas kam gegangen, der dâ wart wol enpfangen, Parcifal, der wolgevar, von ime, †von† sante dar. er beleip niht langer stên. †dis† bat der wirt dar nâher gên. er sprach: »sitzet zuo mir dâ her an. sazt ich iuch verre hin dan, daz wære iu al ze gastlîch.« der wirt was jâmers rîch

*G ie vier gesellen sundersiz. dâ enzwischen was ein underviz, dâ vor ein teppich sinwel. filiroys Frimutel maht wol geleisten daz. eines dinges man dâ niht vergaz: sine hete niht betûret, mit marmel was gemûret drî vierecke viurram. dâr ûffe was des viures nam, holz hiez ›lignâlôê‹. sô grôziu viur sît noch ê sach niemen hie ze Wildenberc. jenez wâren kosticlîchiu werc. der wirt sich selbe sitzen bat gein der mitteren viurstat an ein spanbette. es was worden wette zwischen im unde der vröude; er lebte niht wan töude. in den palas kom gegangen, der dâ wart wol enpfangen, Parzival, der lieht gevar, von im, der in sande dar. in bat der wirt nâher gên. er lie in dâ niht lenger stên: »sitzet zuo mir dâ her an. satzte ich iuch verre dort hin dan, daz wære alze gastlîch«, sô sprach der wirt jâmers rîch.

*T ie vier gesellen ein sundersiz. dâ enzwischen was ein underviz, dâr ûf ein teppich sinewel. Fil li roys Frimutel mohte wol geleisten daz. eines dinges man dâ niht vergaz: sine hete des niht betûret, mit marmel was gemûret drîe vierecke vîurrame. dâr ûf was des viures name, holz heizet ›lignâlôê‹. sô grôziu viur sît noch ê sach niemen hie ze Wildenberc. jenez wâren kosteclîchiu werc. Der wirt sich selbe setzen bat gegen der mitteln hertstat ûf ein spanbette. ez was worden wette Zwischen im unde der vröude; ern lebete niht wan töude. In daz palas kom gegangen, der dâ wart wol enpfangen von im, der in sante dar, Parcifal, der lieht gevar. ern liez in niht langer stân. der wirt bat in nâher gân: »sitzet zuo mir dâ her an. sat ich iuch verre dort hin dan, daz wære al ze gastlîch«, sprach der wirt jâmers rîch.