*D sus warb ie, der ungerne vlôch. vil orse man im wider zôch, durchstochen unt verhouwen. manege tunkele vrouwen sach er bêdenthalben sîn; nâch rabens varwe was ir schîn. sîn wirt in minneclîche enpfienc; daz im nâch vröuden sît ergienc. daz was ein ellens rîcher man; mit sîner hant het er getân manegen stich unt slac, wand er einer porten pflac. bî dem er manegen rîter vant, die ir hende hiengen in diu bant unt den ir houbet wâren verbunden. die heten sölhe wunden, daz si doch tâten rîterschaft; si heten lâzen niht ir kraft. Der burcgrâve von der stat sînen gast dô minneclîchen bat, daz er niht verbære al daz sîn wille wære über sîn guot unt über den lîp. er vuorten, dâ er vant sîn wîp, diu Gahmureten kuste, des in doch wênec geluste. dâr nâch vuor er enbîzen sân. dô diz alsus was getân, der marschalc vuor von im zehant, al dâ er die küneginne vant,

*m sus warp ie, der ungerne vlôch. vil ros man im wider zôch, durchstochen und erhouwen. menige dunkele vrowen sach er beidenthalben sîn; nâch rabens varwe was ir schîn. sîn wirt in minneclîchen enpfienc; daz im nâch vröuden sît ergienc. daz was ein ellentlîcher man; mit sîner hant het er getân menigen stich und slac, wenne er einer porten pflac. bî dem er menigen ritter vant, der sîne hende hienc in diu bant und dem sîn houbt was verbunden. die hâten alle soliche wunden, daz si †durch toren† ritterschaft; si heten macht und kraft. dô der burcgrâve von der stat sînen gast sô minneclîchen bat, daz er niht verbære allez daz sîn wille wære über sîn guot und über den lîp. er vuorte in, dâ er vant sîn wîp, diu Gahmureten kuste, daz in doch wênic luste. dô diz alsus was getân, dâr nâch vuor er enbîzen sân. der marschalc vuor von ime zehant, dâ er die küniginne vant,

*G sus warp ie, der ungerne vlôch. vil orse man im wider zôch, durchstochen und verhouwen. manige tunkele vrouwen sach er bêdenthalben sîn; nâch rabenes varwe was ir schîn. sîn wirt in minniclîche enpfie; daz im ze vröuden sît ergie. er was ein ellens rîcher man; mit sîner hant het er getân manigen stich und slac, wan er einer borte pflac. bî der er manigen rîter vant, die die arme hiengen in diu bant unt diu houbet wâren verbunden. die heten solhe wunden, daz si doch tâten rîterschaft; si hete lâzen niht ir kraft. der burcgrâve von der stat sînen gast dô minniclîchen bat, daz er niht verbære al daz sîn wille wære über sîn guot und über den lîp. er vuorte in, dâ er vant sîn wîp, diu Gahmureten kuste, des in doch wênic luste. dâr nâch vuor er enbîzen sân. dô diz allez was getân, der marschalc reit von im zehant, dâ er die küniginne vant.

*T sus warp ie, der ungerne vlôch. vil orse man hin wider zôch, durchstochen und verhouwen. manec tunkele vrouwen sach er beidenthalben sîn; nâch rabens varwe was ir schîn. Sîn wirt in minneclîche enpfienc; daz im nâch vröuden sît ergienc. der was ein ellens rîcher man; mit sîner hant er hete getân vil manegen stich und slac, wan der einer porte pflac. dâ bî er manegen rîter vant, die die arme hiengen in diu bant und den ir houbet was verbunden. die heten solhe wunden, daz si doch tâten rîterschaft; si heten gelâzen niht ir kraft. Der burcgrâve von der stat sînen gast dô minneclîche bat, daz er niht verbære aldaz sîn wille wære über daz guot und über den lîp. er vuortin, dâ er vant sîn wîp, diu Gahmureten kuste, des in doch lützel luste. dâr nâch vuor er enbîzen sân. dô diz was alsus getân, der marschalc reit von im zehant, aldâ er die küneginne vant.