*D Der gast gedâhte, ich sage iu wie: »Liaze ist dort, Liaze ist hie. mir wil got sorge mâzen. nû sihe ich Liazen, des werden Gurnemanzes kint.« Liazen schœne was ein wint gein der meide, diu hie saz, an der got wunsches niht vergaz - Diu was des landes vrouwe -, alsô von dem süezem touwe diu rôse ûz ir bälgelîn blecket niwen werden schîn, der beidiu wîze ist unt rôt. daz vuogte ir gaste grôze nôt. Sîn manlîch zuht was im sô ganz, sît in der werde Gurnamanz von sîner tumpheit geschiet unt im vrâgen widerriet, ez enwære bescheidenlîche. bî der küneginne rîche saz sîn munt gar âne wort, nâhe aldâ, niht verre dort. maneger kan noch rede sparn, der mêr gein vrouwen ist gevarn. Diu küneginne gedâhte sân: »ich wæne, mich smæhet dirre man, durch daz mîn lîp vertwâlt ist. nein, er tuotz durch einen list. er ist gast, ich bin wirtîn. diu êrste rede wære mîn.

*m Der gast gedâhte, ich sage wie: »Liaze ist dort, Liaze ist hie. mir wil got sorge mâzen. nû sihe ich Liazen, des werden Gurnemanzes kint.« Liazen schœne was ein wint gegen dirre megde, diu hie saz, an der got wunsches niht vergaz - diu was des landes vrouwe -, als von dem süezen touwe diu rôse ûz ir bälgelîn blecket niwen werden schîn, der beidiu wîz ist und rôt. daz vuogete ir gast grôze nôt. sîn manlîch zuht was im sô ganz, sît in der werde Gurnemanz von sîner tumpheit geschiet und im vrâgen widerriet, ez enwære bescheidenlîch. bî der küniginne rîch saz sîn munt gar âne wort, nâhe aldâ, niht verre dort. maniger kan noch rede sparn, der mêr gên vrouwen ist gevarn. Diu künigîn gedâhte sân: »ich wæne, mich smâhet dirre man, durch daz mîn lîp vertwâlet ist. nein, er tuot ez durch einen list. er ist gast, ich bin wirtîn. diu êrste rede wær billîche mîn.

*G Der gast gedâht, ich sage iu wie: »Liaze ist dort, Liaze ist hie. mich wil got leides mâzen. nû sihe ich Liazen, des werden Gurnomanzes kint.« Liazen schœne was ein wint gein dirre meide, diu hie saz, an der got wunsches niht vergaz: dô was des landes vrouwe, als von dem süezen touwe diu rôse ûz ir bälgelîn enblecket niwen werden schîn, der beidiu wîz ist unde rôt. daz vuogete ir gaste grôze nôt. sîn manlîch zuht was sô ganz, sît in der werde Gurnomanz von sîner tumpheite schiet unde im vrâgen widerriet niwan bescheidenlîche. bî der küniginne rîche saz sîn munt gar âne wort, nâhe al dâ, niht verre dort. maniger kan noch rede sparn, der mêr ze vrouwen ist gevarn. diu küniginne dâhte sân: »ich wæne, mich smæht dirre man, dur daz mîn lîp vertwâlt ist. nein, er tuotz durch einen list. er ist gast, ich bin wirtîn. diu êrste rede solte wesen mîn.

*T Der gast gedâhte, ich sagiu wie: »Lyaze ist dort, Lyaze ist hie. got wil mich sorgen mâzen. nû sihich Lyazen, des werden Gurnemanzes kint.« Lyazen schœne was ein wint gegen der megede, diu dâ saz, an der got wunsches niht vergaz: dô was des landes vrouwe, sam von dem touwe diu rôse ûz ir bälgelîn enblecket niuwen werden schîn, der beidiu wîz ist unde rôt. dô vuogte ir gaste grôze nôt. sîn manlîch zuht was wol sô ganz, sît in der werde Gurnemanz von sîner tumpheit gar geschiet unde im vrâgen widerriet, ez enwære bescheidenlîche. bî der küneginne rîche saz sîn munt gar âne wort, nâhe aldâ, niht verre dort. Maneger kan noch rede sparn, der mê ze vrouwen ist gevarn. Diu künegîn gedâhte sân: »ich wæne, mich smæhet dirre man, durch daz mîn lîp vertwâlet ist. Nein, er tuot ez durch einen list. er ist gast, ich bin wirtîn. diu êrste rede sol wesen mîn.