*D mit sporn gruozes pîne mit schenkelen vliegen schîne ûf den poinder solde wenken unt den schaft ze rehte senken unt den schilt gein tjoste vür sich nemen. er sprach: »des lâzet iuch gezemen.« Unvuoge er im sus werte baz denne ein swankel gerte, diu argen kinden brichet vel. dô hiez er komen ritter snel gein im durch tjustieren. er begunde in condwieren einem ze gegen an den rinc. dô brâhte der jungelinc sîn êrsten tjost durch einen schilt, deis von in allen wart bevilt unt daz er hinderz ors verswanc einen starken rîter, niht ze kranc. Ein tjostiure was komen. dô het ouch Parzival genomen einen starken niwen schaft. sîn jugent het ellen unt kraft. der junge süeze âne bart, den twanc diu Gahmuretes art unt angeborniu manheit. daz ors von rabbîne er reit mit volleclîcher hurte dar; er nam der vier nagele war. des wirtes ritter niht gesaz, al vallende er den acker maz.

*m mit sporn gruozes pîne mit schenkele vliegen schîne ûf dem poinder solte wenken und den schaft ze rehte senken und den schilt gegen juste vür sich nemen. er sprach: »des lâzet iuch gezemen.« Unvuoge er ime sus werte baz danne ein swankel gerte, diu argen kinden brichet vel. dô hiez er komen ritter snel gegen ime durch justieren. er begunde in condewieren einem ze gegen an den rinc. dô brâhte der jungelinc sîn êrste juste durch einen schilt, daz von in allen wart bevilt und daz er hinder daz ros verswanc einen stolzen ritter, niht ze kranc. ein ander justiere was dô komen. dô hete ouch Parcifal genomen einen starken niuwen schaft. sîn jugent hete ellen und kraft. der junge süeze âne bart, den twanc diu Gahmuretes art und angeborniu manheit. daz ros von rabbîne er reit mit volleclîcher hurte dar; er nam der vier nagel war. des wirtes ritter niht gesaz, al vallende er den acker maz.

*G mit sporen gruozes pîne nâch schenkelen vliegens schîne ûz dem ponder solte wenken unde den schaft ze rehte senken, den schilt gein tjoste vür sich nemen. er sprach: »des lât iuch gezemen.« unvuoger im sus werte baz danne ein swankel gerte, diu argen kinden brichet vel. dô hiez er komen rîtære snel gein im durch tjostieren. er begunde in condewieren einen ze gegen an den rinc. dô brâhte der jungelinc sîn êrste tjost durch einen schilt, dês von in allen wart bevilt unt daz er hinderz ors verswanc einen starken rîter, niht ze kranc. ein ander tjostiure was komen. nû het ouch Parzival genomen einen starken niwen schaft. Sîn jugent het ellen unde kraft. der junge süeze âne bart, des twang in Gahmuretes art unde angeborniu manheit. daz ors von rabîne er reit mit volliclîcher hurte dar; er nam der vier nagele war. des wirtes rîter niht gesaz, al vallende er den acker maz.

*T mit sporn gruozes pîne, nâch schenkeln vliegens schîne, »in dem pondier sult ir wenken unde den schaft ze rehte senken unde gegen der tjost vür sich nemen.« er sprach: »des lât iuch gezemen.« unvuoge er im sus werte baz danne ein swankel gerte, diu argen kinden brichet vel. Die hiez er komen, rîter snel, gegen im durch tjostieren. er begundin condewieren einen ze gegene an den rinc. dô brach der jungelinc sîn êrste tjost durch den schilt, dês von in allen wart bevilt unde daz er hinderz ors swanc. Ein starker rîter, niht ze kranc, zer andern tjost was komen. Nû hete ouch Parcifal genomen einen starken îwînen schaft. sîn jugent hete ellen unde kraft. der junge süeze âne bart, des twanc in Gahmuretes art unde angeborniu manheit. daz ors von rabîne er reit mit volleclîcher hurte dar; er nam der vier nagele war. Des wirtes rîter niht vergaz, al vallende er den acker maz.