*D ine weiz, wer si des bæte, juncvrouwen mit rîcher wæte unt an lîbes varwe minneclîch, die kômen zühte site gelîch. si truogen unt strichen schiere von im sîn amesiere Mit blanken, linden henden. jâne dorft in niht ellenden, der dô was witze ein weise. sus dolt er vreude unt eise. tumpheit er wênic gein in engalt. juncvrouwen kiusche unde balt in alsus kunrierten. swâ von si parlierten, dâ kunder wol geswîgen zuo. ez dorft in dunken niht ze vruo, wan von in schein der ander tac. der glast alsus in strîte lac, sîn varwe laschte beidiu lieht. des was sîn lîp versûmet nieht. Man bôt ein badelachen dar, des nam er vil kleine war. sus kunder sich bî vrouwen schemen; vor in wolt ers niht umbe nemen. juncvrouwen muosen gên, sine torsten dâ niht langer stên. ich wæne, si gerne heten gesehen, ob im dort unde iht wære geschehen. wîpheit vert mit triwen, si kan vriwendes kumber riwen.

*m ine weiz, wer si des bæte, juncvrouwen in rîcher wæte und an lîbes varwe minneclîch, die kômen zühte site gelîch. si twuogen und strichen schiere von ime sîn amesiere mit blanken, linden henden. jô endorfte in niht ellenden, der dô was witze ein weise. sus dolt er vröude und eise. tumpheit er wênic gegen in engalt. juncvrowen kiusch und balt in alsus kunrierten. wâ von si parlierten, dâ kunde er wol geswîgen zuo. ez endorft in dunken niht ze vruo, wanne von in schein der ander tac. der glast alsus in strîte lac, sîn varwe laste beidiu lieht. des was sîn lîp versweinet niht. man bôt ein badelachen dar, des nam er harte kleine war. sus kunde er sich bî vrouwen schemen; vor in wolt ers niht umbe nemen. die juncvrouwen muosten gân, si getorsten dâ niht langer stân. ich wæne, si gerne heten gesehen, ob im dort unde iht wære geschehen. wîpheit vert mit triuwen, si kan wol vriundes kumber riuwen.

*G Ine weiz, wer si des bæte, juncvrouwen in rîcher wæte, an lîbes varwe minniclîch, die kômen zühte site gelîch. si twuogen unde strichen schier von im sîn amesier mit ir blanken, linden henden. jâne dorfte in niht ellenden, der dâ was witze ein weise. sus dolt er vröude unde eise. tumpheit er wênic gein in engalt. juncvrouwen kiusche unde balt in alsus kunrierten. swâ von si parlierten, dâ kunder wol geswîgen zuo. jân dorfte in dunken niht ze vruo, wan von in schein der ander tac. der glast alsus in strîte lac, sîn varwe laschte beidiu lieht. des was sîn lîp versûmet niht. man bôt ein badelachen dar, des nam er vil kleine war. sus kunder sich bî vrouwen schemen; vor in wolt erz niht umbe nemen. die juncvrouwen muosen gên, si getorsten dâ niht lenger stên, die, wæne ich, gerne heten gesehen, obe im dort unden iht wære geschehen. wîpheit vert mit triwen, si kan vriundes kumber riwen.

*T Ine weiz, wer si des bæte, juncvrouwen in rîcher wæte unde an lîbes varwe minneclîch, die kâmen zühte site glîch. si twuogen unde strichen schiere von im sîn amesiere mit blanken, linden henden. jône dorftin niht ellenden, der dâ witze was ein weise. sus dolter vröude unde eise. tumpheit er wênic dâ engalt. ein juncvrouwe, beidiu kiusche unde balt, in alsus condewierte, dâ von er sich parelierte. dâ kunder wol geswîgen zuo. jâne dorftez in dunken niht ze vruo, daz von in schein der ander tac. der glast alsus in strîte lac, sîn varwe gelaste beidiu lieht. des was sîn lîp versûmet nieht. Man bôt ein badelachen dar, des nam er vil kleine war. Sus kunder sich vor vrouwen schemen; vor in wolterz niht umbe nemen. Die juncvrouwen muosen gân, die liez er lenger dâ niht stân. Ich wæne, si gerne heten gesehen, ob im dort unden iht wære geschehen. wîpheit vert mit triuwen, si kan vriundes kumber riuwen.