*D Alsô sprach der tumbe man: »mîner muoter volc niht bûwen kan, jâne wehset niht sô lanc ir sât, swaz si ir in dem walde hât. grôz regen si selten dâ verbirt.« Gurnemanz de Graharz hiez der wirt ûf dirre burc, dar zuo er reit. dâ vor stuont ein linde breit ûf einen grüenem anger. der was breiter noch langer niht wan ze rehter mâze. daz ors unt ouch diu strâze in truogen, dâ er sitzen vant, des was diu burc unt ouch daz lant. Ein grôziu müede in des betwanc, daz er den schilt unrehte swanc ze verre hinder oder vür, êt ninder nâch der site kür, die man dâ gein prîse maz. Gurnamanz, der vürste, al eine saz. ouch gap der linden tolde ir schaten, als si solde, dem houptman der wâren zuht. des site was vor valsche ein vluht. der enpfienc den gast, daz was sîn reht. bî im was ritter noch kneht. Sus antwurte im dô Parzival ûz tumben witzen sunder twâl: »mich bat mîn muoter nemen rât ze dem, der grâwe locke hât.

*m alsô sprach der tumbe man: »mîner muoter volc niht bûwen kan, jâ enwehset niht sô lanc ir sât, waz si in dem walde hât. grôz regen si selten dâ verbirt.« Gurnemanz de Graharz hiez der wirt ûf dirre burc, dâ zuo er reit. dâ vor stuont ein linde breit ûf einem grüenen anger. der was breiter noch langer niht wanne ze rehter mâze. daz ros und ouch diu strâze in truogen, dâ er sitzen vant, des diu burc was und daz lant. ein grôziu müede in des betwanc, daz er den schilt unrehte swanc ze verre hinder oder vür, ouch niendert nâch der mâze kür, die man dô gegen prîse maz. Gurnemanz, der vürste, aleine saz. ouch gap der linden tolde ir schaten, als si solde, dem houbetman der wâren zuht. des site was vor valsche ein vluht. der enpfienc den gast, daz was sîn reht. bî ime was der ritter noch der kneht. sus sprach zuo ime dô Parcifal ûz tumben witzen sunder twâl: »mich bat mîn muoter nemen rât zuo dem, der grâwe locke hât.

*G alsô sprach der tumbe man: »mîner muoter volc niht bûwen kan, ez wehset niht sô lanc ir sât, swaz sir in dem walde hât. grôz regen si selten dâ verbirt.« Gurnomanz de Graharz hiez der wirt ûf der burc, dâ zuo er reit. dâ vor stuont ein linde breit Ûf einem grüenen anger. ern was breiter noch langer niwan ze rehter mâze. daz ors unde diu strâze in truogen, dâ er sitzen vant, des was diu burc unt ouch daz lant. ein grôziu müede in des betwanc, daz er den schilt unrehte swanc ze verre hinder oder vür, êt ninder nâch der site kür, die man dâ gein prîse maz. Gurnomanz, der vürste, al eine saz. ouch gap der linden tolde ir schate, als si solde, dem houbetman der wâren zuht. des site was vor valsche ein vluht. er enpfie den gast, daz was sîn reht. bî im was rîter noch der kneht. des antwurt im dô Parzival ûz tumben witzen sunder twâl: »mich bat mîn muoter nemen rât ze dem, der grâwe locke hât.

*T alsô sprach der tumbe man: »mîner muoter volc niht bûwen kan, ez enwehset niht sô lanc ir sât, swaz sir in dem walde hât. grôz regen si selten dâ verbirt.« Gurnemanz de Greharz hiez der wirt ûf der burc, dâ zuo er reit. dâ vor stuont ein linde breit ûf einem grüenen anger. daz enwas breiter noch langer niuwan ze rehter mâze. daz ors unde diu strâze in truogen, dâ er sitzen vant, des was diu burc unde daz lant. ein grôze müede in des twanc, daz er den schilt unrehte swanc ze verre hinder oder vür, eht niender nâch der site kür, die man dô gegen prîse maz. Gurnemanz aleine saz. Ouch gap der linden tolde ir schate, alse si solde, dem houbetman der wâren zuht. des site was gegen valsche ein vluht. er enpfienc den gast, daz was sîn reht. bî im was weder rîter noch kneht. Des antwurtim dô Parcifal ûz tumben witzen sunder twâl: »mich bat mîn muoter nemen rât zuo dem, der grâwe locke hât.