*D Dô sprach der unwîse: »iwerm werdem prîse ist gegeben ein smæhiu letze. ich bin sîn vengec netze, ich sol in wider in iuch smîden, daz irz enpfindet ûf den liden. Ez ist dem künege Artus ûf sînen hof unt in sîn hûs sô manec werder man geriten, durch den ir lachen hât vermiten, unt lachet nû durch einen man, der niht mit ritters vuore kan.« In zorne wunders vil geschiht. sînes slages wære im erteilet niht vorem rîche ûf dise magt, diu vil von vriwenden wart geklagt. ob si halt schilt solde tragen! diu unvuoge ist dâ geslagen, wan si was von arde ein vürstîn. Orilus und Læhelin, ir bruoder, hetenz die gesehen, der slege minre wære geschehen. Der verswigene Anthanor, der durch swîgen dûht ein tôr, sîn rede unt ir lachen was gezilt mit einen sachen: ern wolde nimmer wort gesagen, sine lachete, diu dâ wart geslagen. dô ir lachen wart getân, sîn munt sprach ze Keien sân:

*m dô sprach der unwîse: »iuwerm werden prîse ist geben ein smæhiu letze. ich bin sîn vengic netze, ich sol in wider in iuch smîden, daz irs enpfindet ûf den liden. ez ist dem künige Artus ûf sînen hof und in sîn hûs sô manic wert man geriten, durch die ir lachen hât vermiten, und lachet nû durch einen man, der niht mit ritters vuore kan.« in zorne wunders vil geschiht. sînes slages wære ime erteilet niht vorme rîche ûf dise maget, diu vil von vriunden wirt geklaget. ob si halt schilt solte tragen! diu unvuoge ist dâ geslagen, wanne si was von arde ein vürstîn. Orilus und Lehelin, ir bruoder, hetenz die gesehen, der slege minner wære geschehen. Der verswigene Anthanor, der durch swîgen dûhte ein tôr, sîn rede und ir lachen was gezilt mit einen sachen: er enwolte niemer wort gesagen. †† dô ir lachen wart getân, sîn munt sprach ze Keien sân:

*G dô sprach der unwîse: »iwerem werden brîse ist gegeben ein smæhiu letze. ich bin sîn vencnetze unde sol in hin wider in iuch smîden, daz irs enpfindet ûf den liden. ez ist dem künige Artus ûf sînen hof und in sîn hûs sô manic wert man geriten, durch den ir lachen habet vermiten, unde lachet nû durch einen man, der niht mit rîters vuore kan.« in zorne wunders vil geschiht. sînes slages wære im erteilt niht vor dem rîche ûf dise maget, diu vil von vriunden wirt geklaget. op si halt schilt solte tragen! diu ungevuoge ist hie geslagen, wan si was von arde ein vürstîn. Orillus und Lehelin, ir bruoder, hetenz die gesehen, der slege minner wære geschehen. der verswigen Antanor, der durch swîgen dûht ein tôr, sîn rede und ir lachen was gezilt mit zwein sachen: er wolte nimer wort gesagen, Sine lachte, diu dâ wart geslagen. dô ir lachen wart getân, sîn munt sprach ze Kayn sân:

*T dô sprach der unwîse: »iuwerm werden prîse ist gegeben ein smæhiu letze. ich bin sîn vincnetze und sol ez hin wider in iuch smîden, daz irs gevüelet ûf den liden. ez ist dem künege Artus ûf sînen hof und in sîn hûs sô manec werder man geriten, durch den ir lachen hât vermiten, und lachet nû durch einen man, der niht mit rîters vuore kan.« Durch zorn wunders vil geschiht. sînes slages wære im erteilet niht vorme rîch ûf dise maget, diu vil von vriunden wirt geklaget. ob si halt schilt solte tragen! diu ungevuoge hie ist geslagen, wan si was von art ein künegîn. Orilus und Lehelin, ir bruoder, hetenz die gesehen, der slege minre wæren geschehen. der verswigen Antenor, der durch swîgen was ein tôr, sîn rede und ir lachen was gezilt mit zwein sachen: er enwolte niemer wort gesagen, si lachete, diu dâ was geslagen. dô ir lachen was getân, sîn munt sprach zuo Key sân: