*D dâne wâren si ninder în geslagen. der hêrre muose vürbaz tragen disen wâpenlîchen last in manegiu lant, der werde gast, Nâch dem anker disiu mâl, wander deheiner slahte twâl hete ninder noch gebite. wie vil er lande durchrite und in schiffen umbevüere, ob ich iu dâ nâch swüere, sô seit iu ûf mînen eit mîn ritterlîchiu sicherheit, als mir diu âventiure giht; ine hân nû mêr geziuges niht. diu seit, sîn manlîchiu kraft behielt den prîs in heidenschaft, ze Marroch und ze Persia. sîn hant bezalt ouch anderswâ, ze Damasc und ze Halap, und swâ man ritterschaft dâ gap, ze Arabie und vor Arabi, daz er was gegenstrîtes vrî vor ieslîch einem man. disen ruoft er dâ gewan. sînes herzen gir nâch prîse greif; ir aller tât vor im zersleif und was vil nâch entnihtet. sus was ie der berihtet, der gein im tjustierens pflac. man jach im des ze Baldac.

*m dâ wâren si wider în geslagen. der hêrre muose vürbaz tragen disen wâpenlîchen last in menigiu lant, der werde gast, nâch dem anker disiu mâl, wenne er neheiner slahte twâl hete niender noch gebite. wie vil lande er durchrite und in schiffen umbevüere, ob ich ie dâ nâch swüere, sô seite ich ie ûf mînen eit mîn ritterlîche sicherheit, als mir diu âventiure giht; wir hân nû mê geziuges niht. †Dô† seit, sîn manlîchiu kraft behielt den brîs in heidenschaft, zuo Marroch und in Persia. sîn hant bezalte ouch anderswâ, zuo Damasce und zuo Halap, †zuo dem† wâ man ritterschaft dâ gap, zuo Arabie und vor Arabi, daz er was gegenstrîtes vrî vor ieglîchem einem man. disen ruof er dâ gewan. sînes herzen gir nâch prîse greif; ir aller tât vor ime zersleif und was vil nâch entnihtet. sus was ie der berihtet, der gegen ime justierens pflac. man jach ime des zuo Baldac.

*G dâne wâren si ninder în geslagen. der hêrre muose vürbaz tragen disen wâpenlîchen last in vrömdiu lant, der werde gast, nâch dem anker disiu mâl, wan er deheiner slahte twâl hete ninder noch gebite. wie vil er lande durchrite oder in scheffen umbevüere, obe ich iu dar nâch swüere, sô saget iu ûf mînen eit mîn rîterlîchiu sicherheit, als mir diu âventiure giht; ich hân nû mê geziuges niht. diu seit, sîn manlîchiu kraft behielt den prîs in heidenschaft, ze Maroch unt ze Persia. sîn hant bezalt ouch anderswâ, ze Tomasch und ze Halap, unde swâ man rîterschaft dâ gap, ze Arabie unt ze Arabi, daz er was gein strîte vrî von iegeslîchem einen man. disen ruoft er dâ gewan. sînes herzen gir nâch brîse greif; ir aller tât vor im zersleif Und was vil nâch entnihtet. sus wart ie der berihtet, der gein im tjostierens pflac. man jach im des ze Baldac.

*T dâne wâren si niender în geslagen. der hêrre muoste vürbaz tragen disen wâpenlîchen last in manegiu lant, der werde gast, nâch dem anker disiu mâl, wander deheiner slahte twâl hete niender noch gebite. Wie vil er lande durchrite oder in schiffen umbevüere, ob ich iu dar nâch swüere, sô sagete iu ûf mînen eit mîn rîterlîchiu sicherheit, als mir diu âventiure giht; ine hân nû mêre geziuge niht. diu saget, daz sîn manlîchiu kraft behielte den prîs in heidenschaft, ze Marroch und ze Persia. sîn hant bezalte ouch anderswâ, ze Damasc und ze Halap, und swâ man rîterschaft dâ gap, ze Arabye und ze Arabi, daz er was gegenstrîtes vrî gegen ieslîchem einem man. disen ruof er dâ gewan. sînes herzen girde nâch prîse greif; ir aller tât vor im zersleif und was vil nâch entnihtet. sus was ie der berihtet, der tjostierens wider im pflac. man jach im des ze Baldac.