*D mîn tjoste in hinderz ors verswanc, daz in der satel ninder dranc. ich hân dicke prîs bezalt unt manegen ritter ab gevalt. des enmoht ich nû geniezen niht. ein hôhez laster mir des giht. Si hazzent mich besunder, die von der tavelrunder, der ich ähte nider stach, dâ ez manec wert juncvrouwe sach, umbe den sperwære ze Kanadic. ich behielt iu prîs unt mir den sic. daz sâhet ir unt Artus, der mîne swester hât ze hûs, die süezen Cunnewaren. ir munt kan niht gebâren mit lachen, ê si den gesiht, dem man des hœhsten prîses giht. wan kœme mir doch der selbe man, sô würde ein strîten hie getân als hiute morgen, dô ich streit unt eime vürsten vrumte leit, der mir sîn tjustieren bôt. von mîner tjoste lag er tôt. Ich enwil iu niht von zorne sagen, daz maneger hât sîn wîp geslagen umb ir krenker schulde. het ich dienest oder hulde, daz ich iu solte bieten, ir müest iuch mangels nieten.

*m mîn hant in hinderz ros verswanc, daz in der satel nider dranc. ich hân dicke prîs bezalt und manigen ritter ab gevalt. des enmohte ich nû geniezen niht. mîn hôhez laster mir des giht. si hazzent mich besunder, die von der tavelrunder, der ich ehte nider stach, daz ez manige juncvrouwe sach, umbe den sperwer ze Kanedic. ich behielt iu den prîs und mir den sic. daz sâhet ir und Artus. der hât mîne swester ze hûs, die süezen Cunnewaren. ir munt kan niht gebâren mit lachene, ê si den gesiht, dem man des hœhesten prîses giht. wanne kæm mir doch der selbe man, sô würde ein strît hie getân als hiute morgen, dô ich streit und einem vürsten vrumete leit, der mir sîn justieren bôt. von mîner juste lac er tôt. ich enwil iu niht von zorne sagen, daz maniger hât sîn wîp geslagen umb ir krenker schulde. hete ich dienest oder hulde, daz ich iu solte bieten, ir müest iuch mangels nieten.

*G mîn tjost in hinder daz ors swanc, daz in der satel ninder dranc. ich hân dicke brîs bezalt und manigen rîter ab gevalt. des enmoht ich nû geniezen niht. ein hôhez laster mir des giht. si hazzent mich besunder, die von der tavelrunder, der ich ahte nider stach, dâz manic wert vrouwe sach, umbe den sparwære ze Kanadic. ich behielt iu brîs und mir den sic. daz sâhet ir und Artus, der mîne swester hât ze hûs, die süezen Kunewaren. der munt kan niht gebâren mit lachene, ê si den gesiht, dem man des hœhesten brîses giht. wan kœme mir nû der selbe man, sô würde ein strîten hie getân als hiute morgen, dô ich streit unde einem vürsten vrumte leit, der mir sîn tjostieren bôt. von mîner tjoste lag er tôt. ich wil iu niht von zorne sagen, daz maniger hât sîn wîp geslagen umbe michel krenker schulde. het ich dienst oder hulde, daz ich iu solte bieten, ir müeset iuch mangels nieten.

*T mîn tjost in hinderz ors swanc, daz in der satel nider dranc. ich hân dicke prîs bezalt und manegen rîter abe gevalt. des moht ich nû geniezen niht. ein hôhez laster mir des giht. Si hazzent mich besunder, die ob der tavelrunder, der ich ahte nider stach, daz ez manige juncvrouwe sach, umb den sperwer zuo Kanadic. ich behielt iu prîs und mir den sic. daz sâhet ir und Artus, der mîne swester hât zuo hûs, die süezen Cunnewaren. ir munt kan niht gebâren mit lachene, ê si den siht, dem man des besten prîses giht. wan kœme mir der selbe man, sô würde ein strîten hie getân als hiute morgen, dô ich streit und eime vürsten vrumte leit, der mir sîn tjostieren bôt. von mîner tjost lac er tôt. ich enwil iu niht von zorne sagen, daz maneger hât sîn wîp geslagen umb michel krenker schulde. het ich dienst oder hulde, daz ich iu solte bieten, ir müeset iuch mangels nieten.