*D gelîche eime rîters trûte, si hiez Jeschute. Diu vrouwe was entslâfen. si truoc der minne wâfen: einen munt durchliuhtic rôt unt gerndes ritters herzen nôt. innen des diu vrouwe slief, der munt ir von ein ander lief; der truoc der minne hitze viwer. sus lac des wunsches âventiwer. von snêwîzem beine nâhe bî ein ander kleine, sus stuonden ir die liehten zene. ich wæne, mich iemen küssens wene an einen sus gelobten munt, daz ist mir selten worden kunt. ir deckelachen zobelîn erwant an ir hüffelîn, daz si durch hitze von ir stiez, dâ si der wirt al eine liez. si was geschicket unt gesniten, an ir was kunst niht vermiten. got selbe worht ir süezen lîp. ouch hete daz minneclîche wîp langen arm und blanke hant. der knappe ein vingerlîn dâ vant, daz in gein dem bette twanc. dô er mit der herzoginne ranc, dô dâht er an die muoter sîn, diu riet an wîbes vingerlîn.

*m gelîch einem ritters trûte. diu vrouwe hiez Jeschute. si was dâr in entslâfen und truoc der minne wâfen: einen munt durchliuhtic rôt und gerndes ritters herzenôt. Innen des diu vrouwe slief, der munt ir von ein ander lief; der truoc der minne hitze viure. sus lac des wunsches âventiure. von snêwîzem beine nâhe bî ein ander kleine, sus stuonden ir die liehten zene. ich wæne, mich ieman küsse wene an einen sô wol gelobeten munt, daz ist mir selten worden kunt. ir deckelachen zobelîn erwant ir an ir hüffelîn, daz si durch hitze von ir stiez, dâ si der wirt aleine liez. si was geschicket und gesniten, an ir was kunst niht vermiten. got selbe worht ir süezen lîp. ouch hete daz minneclîche wîp langen arm und blanke hant. der knappe ein vingerlîn dâ vant, daz in gegen dem bette twanc. dô er mit der herzoginne ranc, dô dâht er an die muoter sîn, diu riet an wîbes vingerlîn.

*G gelîch einem rîters trûte. si hiez Jeschute. diu vrouwe was entslâfen. si truoc der minnen wâfen: einen munt durchliuhtic rôt unde gernde rîters herzen nôt. in des dô diu vrouwe slief, der munt ir von ein ander lief; der truoc der minnen hitze viur. sus lac des wunsches âventiur. mit snêwîzen beine nâhen bî ein ander kleine, sus stuonden ir die liehten zene. ich wæne, mich iemen kusses wene an einen sus wol gelobten munt, daz ist mir selten worden kunt. ein declachen zobelîn erwant an ir hüffelîn, daz si durch hitze von ir stiez, die der wirt al eine liez. si was geschickt und gesniten, an ir was künste niht vermiten. got selbe worhte ir süezen lîp. ouch het daz minniclîche wîp langen arm und blanke hant. der knappe ein vingerlîn dâ vant, daz in gein dem bete twanc, dâ er mit der herzoginne ranc. dô dâhter an die muoter sîn, diu riet an wîbes vingerlîn.

*T lac glîche eime rîters trûte. si hiez vrou Jeschute. diu vrouwe was entslâfen. si truoc der minnen wâfen: einen munt, der liuhtet rôt, und gerndes ritters herzen nôt. in des daz diu vrouwe slief, der munt ir von ein ander lief; der truoc der minne hitze viur. sus lac des wunsches âventiur. mit snêwîzem beine nâhen bî ein ander kleine, sus stuonden ir die liehten zene. ich wæn, daz mich ieman küssen wene an einen wol gelobeten munt, daz ist mir selten worden kunt. ein deckelachen zobelîn erwant an ir hüffelîn, daz si durch hitze von ir stiez, die der wirt aleine liez. si was geschicket und gesniten, an ir was kunst niht vermiten. got machte selbe ir süezen lîp. ouch hete daz minneclîche wîp lange arme und blanke hant. der knappe ein vingerlîn dâ vant, daz gein dem bette dranc, dâ er mit der herzoginne ranc. Dô dâht er an die muoter sîn, diu im riet an wîbes vingerlîn.