*D dô kom geriten Tampanis, ir mannes meisterknappe wîs, unt kleiner juncvrouwen vil. dâ gie ez ûz der vreuden zil. die sageten klagende ir hêrren tôt. des kom vrou Herzeloyde in nôt. si viel hin unversunnen. die ritter sprâchen: »wie ist gewunnen mîn hêrre in sîme harnas, sô wol gewâpent, sô er was?« Swie den knappen jâmer jagete, den helden er doch sagete: »mînen hêrren lebens lenge vlôch. sîn härsenier von im er zôch, des twanc in starkiu hitze. geunêrtiu heidensch witze hât uns verstoln den helt guot. ein ritter hete bockes bluot genomen in ein langez glas. daz sluog er an den adamas. dô wart er weicher danne ein swamp. den man noch mâlet vürz lamp unt ouchz kriuze in sîne klân, den erbarme, daz dâ wart getân! dô si mit scharn zein ander riten, âvoy, wie dâ wart gestriten! Des bâruckes ritterschaft sich werte wol mit ellens kraft. von Baldac ûf dem gevilde durchstochen wart vil schilde,

*m Dô kam geriten Tampanis, ir mannes knappen meister wîs, und kleiner junchêrren vil. dâ gienc ez ûz der vröuden zil. die sageten klagende ir hêrren tôt. des kam vrouwe Herczeloide in nôt. si viel hin unversunnen. die ritter sprâchen: »wie ist gewunnen mîn hêrre in sînem harnas, sô wol, als er gewâpent was?« wie den knappen jâmer jagete, den hêrren er doch sagete: »mînen hêrren lebennes lenge vlôch. sîn hersenier von ime er zôch, des twanc in starkiu hitze. †generte† heidensche witze hât uns verstoln den helt guot. ein ritter hete bockes bluot genomen in ein langez glas. daz sluoc er ûf den adamas. dô wart er weicher dan ein swamp. den man noch mâlet vür daz lamp und ouch daz kriuz in sînen klân, den erbarme, daz dâ wart getân! dô si mit scharn zen andern riten, âvoy, wie dâ wart gestriten! des bâruckes ritterschaft sich werte wol mit ellens kraft. vor Baldac ûf dem gewilde durchstochen wart vil schilte,

*G dô kom geriten Tampanis, ir mannes meister ein knappe wîs, unde kleiner junchêrren vil. dâ gieng ez ûz der vröuden zil. si sagten klagende ir hêrren tôt. des kom vrô Herzeloide in nôt. si viel hin unversunnen. die rîter sprâchen: »wie ist gewunnen mîn hêrre in sînem harnas, sô wol gewâpent er was?« swie den knappen jâmer jagte, den helden er doch sagte: »mînen hêrren lebens lenge vlôch. Sîn härsenier er von im zôch, des twanc in starkiu hitze. geunêrtiu heldes witze hât uns verstoln den helt guot. ein rîter hete bockes bluot genomen in ein langez glas. daz sluog er ûf den adamas. dô ward er weicher danne ein swamp. den man noch mâlet vür daz lamp unt daz kriuze in sînen klân, dem erbarme, daz dâ sî getân! dô si mit scharen ze ein ander riten, âvoy, wie dâ wart gestriten! des bâruckes rîterschaft sich werte wol mit ellens kraft. vor Baldac ûf dem gevilde durchstochen wart vil schilde,

*T dô kam geriten Tampanis, ir mannes meisterknappe wîs, und kleiner junchêrren vil. dâ gienc ez ûz der vreuden zil. si sageten klagende ir hêrren tôt. des kam vrô Herzeloyde in nôt. si viel hin unversunnen. die ritter sprâchen: »wie ist gewunnen mîn hêrre in sîme harnas, sô wol gewâpent, sô er was?« wie den knappen jâmer jagete, den helden er dô sagete: »mînen hêrren lebens lenge vlôch. sîn hersenier er von im zôch, des twanc in starkiu hitze. geunêrtiu heidensch witze hât uns verstoln den helt guot. ein ritter, der hete bockes bluot genomen in ein langez glas. daz sluoc er ûf den adamas. dô wart er weicher dan ein swamp. den man mâlet vür ein lamp und daz kriuze in sînen klân, den erbarme, daz dâ sî getân! Dô si mit scharn zuo ein ander riten, âvoy, wie dâ wart gestriten! vor Baldac ûf dem gevilde durchstochen wart vil schilde,